बडा दशैंको पहिलो दिन आज घटस्थापनाबाट पुनः निर्भीक पत्रकारिताको यात्रा शुरु गरिएको छ । हाम्रो समाजमा रहेका रावण र महिषासुर रुपी दैत्यहरुको अन्त्यका लागि शस्त्र पुजन याने कि “डन न्यूज”को शुभारम्भ आजबाट हामीले गर्दैछौं । प्राचीन कालमा यसै दिन विजयको प्रार्थना गरेर रण–यात्राको लागि प्रस्थान गरिन्थ्यो । कलमरुपी यस शस्त्र र अस्त्रलाई बोकेर समाजमा देखिएका विकृति, विसंगति, भ्रष्टाचार, अनियमिता, अन्याय, अत्याचार, दमन र शोषणका विरुद्धमा कडा भन्दा कडा रुपमा हामी प्रस्तुत हुने प्रण गर्दछौं ।

२०६८ साल फागुन १ गते जनयुद्ध दिवसको अवसर पारेर सञ्चालनमा ल्याईएको ‘डन न्यूज डेली’ले जसरी कलमरुपी शस्त्र निर्भीकताका साथ चलायो, पुनः त्यही यात्रालाई हामीले आज घटस्थापनाका दिनबाट निरन्तरता दिदैंछौं । हरेक क्षेत्रमा वेथिति व्याप्त छ । ‘डन न्यूज’ एक्लैले मात्र सबै वेथिति र समस्या समाधान गर्न सम्भव छैन । तर जति सकिन्छ त्यो ईमान्दारिताका साथ गर्ने प्रण गर्दछौं । विभिन्न आवरणमा हाम्रो समाजभित्र लुकेका भ्रष्ट, दलाल, माफिया, गुण्डा, अपराधी, पतित र व्यभिचारीमाथि हाम्रो निर्मम प्रहार हुनेछ । पत्रकारिताको आचारसंहिता र प्रचलित कानुनको परिधिभित्र रहेर गलत यस्ता पात्रहरुको हरेक धन्दामाथि हामी निगरानी र चिरफार गर्नेछौं । यस्ता खराब पात्र र प्रवृत्तिहरुको विषयमा डन न्यूजमा तपाईहरुले खुलेर विश्वासका साथ सूचना तथा जानकारी दिन सक्नुहुनेछ । हामी गोपनियताको पूर्ण रक्षा गर्नेछौं ।

अन्त्यमा, विविध प्राविधिक कारणवश हामीले डन न्यूज डेलीलाई छापा माध्यमका रुपमा अघि बढाउन नसके पनि डिजिटल पत्रिकाकैं रुपमा ‘डन न्यूज’लाई फेरि तपाईहरु माझ ल्याउन पाउँदा हामीलाई धेरै खुशी लागेको छ । हामीले समाजलाई दिने भनेको सही सूचना र जानकारी नैं हो । जसका कारण एक ईमान्दार, कर्मठ र मेहनती नागरिकले यो समाजमा शिर उठाएर हिड्न सकोस् र गलत प्रवृत्तिका पात्रहरुले शिर झुकाएर हिड्न परोस् । हामी सर्वसाधारण जनताको पक्षमा सदा उभिनेछौं । जनपक्षीय पत्रकारिता नै हाम्रो मूल धर्म र मर्म हो । दवाव, प्रभाव र प्रलोभनमा हामी कहिल्यै फस्ने छैनौं । यो हाम्रो प्रतिवद्धता पनि हो । चूनौंती र कठिनाईसँग पौठेजोरी खेल्न रुचाउने यस ‘डन न्यूज’ले आगामी दिनमा अझै सशक्त, दमदार र शानदार रुपमा आफ्नो यात्रालाई अगाडि बढाउने छ भन्नेमा हामी पूर्ण विश्वस्त छौं ।