काठमाडौँ । त्रिभुवन विश्वविद्यालयको आंशिक प्राध्यापक सङ्घले प्रक्रिया पूरा गरी स्थायी गर्न माग गर्दै आज कीर्तिपुरस्थित विश्वविद्यालयको उपकुलपतिको कार्यालय परिसरमा आज शङ्खनाद गरेको छ ।
सङ्घको जारी आन्दोलनका क्रममा बिहान १०ः०० बजेदेखि दिउँसो ३ः०० बजेसम्म त्यहाँ सहभागी करिब १०० आंशिक प्राध्यापकले शङ्ख बजाएर आवाज उठाएका थिए । सङ्घका प्रचार विभाग सदस्य सुरेश भट्टराईले आफूहरुले समान कामका लागि समान दामका लागि आन्दोलन गरेको बताउनुभयो । सो विश्वविद्यालयमा हाल करिब दुई हजार आंशिक कार्यरत छन् ।
आंशिक प्राध्यापकहरुले एक शैक्षिक सत्र पूरा गरेका सम्पूर्ण प्राध्यापकहरुलाई करार गर्नुपर्ने माग राखेका छन् । विगत १५ वर्षदेखि आंशिक प्राध्यापकहरु आन्दोलनरत भएपनि सम्झौताहरु कार्यान्वयन हुन नसकेको आंशिक प्राध्यापक संघका प्रवक्ता मोहन घिमिरेले बताउनुभयो । आंशिक प्राध्यापक संघका प्रवक्ता घिमिरेले सम्झौंता कार्यान्वयन नभएसम्म आन्दोलन जारी रहने अडान व्यक्त गर्नुभयो ।
वार्ता टोलीका सदस्य एवं संघका महासचिव राजेन्द्र गिरीले लामो समयदेखि प्राध्यापकहरु आन्दोलनरत भए पनि समस्या समाधानका लागि त्रिविले चासो नदिएकोमा दुःख व्यक्त गर्नुभयो । अहिले ९० प्रतिशत बढी कक्षाभार आंशिक शिक्षकहरुले लिनुपर्ने बाध्यता भए पनि काम अनुसारको पारिश्रमिक नपाउनु श्रम तथा वौद्धिक शोषण भएको बताउनुभयो ।
त्रिवि परिसरमा धर्ना दिदैं प्राध्यापक संघले विश्वविद्यालयले ल्याएको निर्देशिका खारेज गर्नुपर्ने, प्राज्ञिक उन्नयनको ग्यारेन्टी गर्नुपर्ने लगायतका मागहरु राखेको छ ।