काठमाडौँ । केपी ओली सरकारको निरंकुशता, फासिवाद र दलाल तथा प्रतिक्रियावादी राज्यसत्ता विरुद्ध अग्रगामी राजनीतिक निकासको निम्ति भन्दै चार राजनीतिक दलहरु बीचमा रणनैतिक संयुक्त मोर्चा निर्माण गर्ने सहमति भएको छ । संयुक्त मोर्चाले यसको अवधारणा, संरचना र आगामी कार्यक्रम सिघ्र घोषणा गर्ने जनाएको छ ।

आज नेत्र विक्रम चन्द ‘विप्लव’ नेतृत्वको प्रतिबन्धित नेपाल कम्युनष्टि पार्टी, वैद्य नेतृत्वको नेपाल कम्युनिष्ट पार्टी (क्रान्तिकारी माओवादी), ऋषिरम कट्टेल नेतृत्वको नेपाल कम्युनिष्ट पार्टी र विश्वभक्त दुलाल (आहुति) नेतृत्वको वैज्ञानिक समाजवादी कम्युनिष्ट पार्टीबीच मोर्चाबन्दी गरेर सरकार विरुद्ध आन्दोलन गर्ने सहमति भएको विज्ञप्तिमा जनाईएको छ ।

महासचिव विप्लव, महासचिव किरण, अध्यक्ष ऋषिराम कट्टेल र संयोजक आहुतीले संयुक्त रुपमा हस्ताक्षर गरेको सो विज्ञप्तिमा वर्तमान दलाल तथा प्रतिक्रियावादी संसदीय व्यवस्था र नेपाली श्रमजीवी जनताबीचको अन्तरविरोध चर्कदैं गएको उल्लेख छ । ‘दलाल तथा प्रतिक्रियावादी पुँजीवादका विभिन्न गुटहरुका बीचमा पनि अन्तरविरोध चर्कदैं गएको छ । दलाल तथा प्रतिक्रियावादी सत्ता, व्यवस्था र सरकारमा आएको गम्भीर संकटलाई फासीवादी तरिकाले हल गर्ने दुष्प्रयासस्वरुप तथा वैदेशिक शक्तिको आड भरोसा र इसारामा केपी सरकारले संसद विघटन गरेको हो भन्ने हाम्रो ठम्याई रहेको छ,’ विज्ञप्तिमा भनिएको छ ।

विज्ञप्तिमा केपी ओलीको कदम निरंकुश एवम् फासिवादी केपी सरकार र उनको पार्टीको आन्तरिक मामिला नभएर दलाल तथा प्रतिक्रियावादी संसदीय व्यवस्थाको असफलताको द्योतक हो भनिएको छ । अहिले देश र जनताले भोगेका समस्याहरुको वास्तविक जनपक्षीय समाधान संसद पुनस्र्थापना वा मध्यावधि निर्वाचन वा यसै व्यवस्थाभित्र केवल सरकार परिवर्तन मात्र गरेर हुन सक्दैन । यसका लागि दलाल तथा प्रतिक्रियावादी राज्यसत्ताको अन्त्य र संघीय जनगणतन्त्र/वैज्ञानिक समाजवादको स्थापना हुनुपर्दछ विज्ञप्तिमा भनिएको छ ।

विज्ञप्तिमा कथित नयाँ संविधानअनुसार भएको चुनावबाट खड्गप्रसाद ओलीको नेतृत्वमा बनेको सरकारले राष्ट्रिय स्वाधीनता, जनतन्त्र र जनजीविकामाथि झनै संकट थोपार्दै आएको उल्लेख छ । कम्युनिष्टको खोल ओढेको केपी सरकारले गर्दै आएको जनघात, राष्ट्रघाट र चरम भ्रष्टाचारी कदमहरुको विरोध र प्रतिवाद गर्दै आईरहेको पनि उल्लेख छ ।