काठमाडौं । चिनियाँ कम्युनिष्ट पार्टीको विशेष टोलीले सत्तारुढ नेकपाका अध्यक्ष पुष्पकमल दाहाल ‘प्रचण्ड’ र अर्का वरिष्ठ नेता माधवकुमार नेपालसँग छुट्टाछुट्टै भेटवार्ता गरेको छ । नेकपाका अध्यक्ष प्रचण्डलाई खुमलटारमा र नेपाललाई बानेश्वरस्थित एभरेष्ट होटलमा टोलीले छलफल गरेको थियो ।

टोलीले आइतबार राष्ट्रपति विद्यादेवी भण्डारीलाई शीतल निवासमा भेटघाट गरेपछि कामचलाउ प्रधानमन्त्री केपी शर्मा ओलीलाई पनि भेटेको थियो । प्रधानमन्त्री ओलीले प्रतिनिधिसभा विघटन गरेसँगै विभाजन भएको नेकपाको विवाद मिलाउन चिनियाँ कम्युनिस्ट पार्टी अहिले सक्रिय बनेको छ ।

टोलीले नेकपा कैं वरिष्ठ नेता झलनाथ खनाल र जनता समाजवादी पार्टीका संघीय परिषद् अध्यक्ष डा.बाबुराम भट्टराईसँग पनि भेट्ने कार्यक्रम रहेको छ । प्रमुख विपक्षी दल नेपाली कांग्रेसका केही शीर्ष नेताहरुलाई पनि टोलीको भेट्ने कार्यक्रम रहेको छ ।

हिजो काठमाडौं आएको चिनियाँ टोलीले यसअघि राष्ट्रपति विद्यादेवी भण्डारीसँग भेटवार्ता गरिसकेको छ । चिनियाँ कम्युनिस्ट पार्टीको अन्तर्राष्ट्रिय विभागका उपमन्त्री कुओ येचौ, महानिर्देशक छुई यानसहितको ४ सदस्यीय टोलीले हिजो काठमाडौं आउनासाथ चिनियाँ दूतावासमा पुगी राजदुत हाउ यान्छीबाट नेपालको वस्तुस्थितिका बारेमा बुझेर भेटघाटलाई तिब्रता दिएको हो ।

यसअघि पूर्वमाओवादी र एमालेलाई एक बनाउन पहल गरेको चिनियाँ टोलीले बिचमा बढेको विवाद पनि समाधान गरेको थियो । तर यसपटक सत्तारुढ नेकपाको विवादले चर्को रुप धारणा गरिसकेको छ । यो अवस्थामा चिनियाँ टोलीले के कसरी यो समस्यालाई समाधान गर्छ त्यो भने प्रतिक्षा कैं विषय बनेको छ ।