पोखरा । पोखरापाटीका सहसम्पादक तथा सञ्चारकेन्द्रका पोखरा प्रमुख पत्रकार राजकुमार घिमिरे सर्वोच्च अदालतको आदेशले १९ दिनपछि हिजो रिहा भएका छन् । प्रहरीले प्रतिबन्धित नेकपाको जनसभाको समाचार संकलन गरेर फर्कदैं गर्दा मंसिर ८ गते पत्रकार घिमिरेलाई बिच बाटोबाट पक्राउ गरेको थियो ।

पत्रकार घिमिरेलाई नियतवश कास्की प्रहरीले पक्राउ गरेको बारम्बार अदालतमा कुनै पनि ठोस प्रमाण पेस गर्न नसकेबाट नै त्यसको पुष्टि हुँदै आईरहेको छ । जब प्रमाण नै जुटाउन नसक्ने प्रहरीले थुनामा राखेर पत्रकारको मनोबल गिराउने र दुःख दिने नियतले पक्राउ गर्नु प्रेसजगत माथि कैं ठाडो हस्तक्षेप हो । पत्रकार घिमिरेलाई नेपाल पत्रकार महासंघ कास्कीका अध्यक्ष दीपेन्द्र श्रेष्ठको रोहबरमा रिहा गरिएको थियो ।

नेत्रविक्रम चन्द ‘विप्लव’ नेतृत्वको प्रतिबन्धित नेपाल कम्युनिष्ट पार्टीले वडा नं. ३३ देउरालीस्थित सुकुम्वासीवस्तीमा आयोजना गरेको जनसभा कार्यक्रमको समाचार संकलनका लागि गएका पत्रकार घिमिरेसहित पाँचजनालाई प्रहरीले पक्राउ गरेको थियो ।

पत्रकार घिमिरे पक्राउ परेपछि नेपाल पत्रकार महासंघ गण्डकी शाखा, कास्की शाखा, प्रेस युनियन, जनपत्रकार संगठन कास्की लगायतका विभिन्न संघसंस्थाहरुले प्रेस विज्ञप्ति जारी गर्दै विरोध जनाएका थिए ।

पत्रकार घिमिरेसहित पक्राउ परेका यमप्रसाद भट्टराई, काली पाण्डे र विशाल श्रेष्ठ पनि सोही दिन रिहा भएका छन् । कुमार परियारलाई भने कास्की प्रहरीले अन्य मुद्दा पनि भएकोले अनुसन्धानका लागि थुनामा राखिरहेको छ ।