News Portal

ताजा शिर्षकहरु

चर्चित शिर्षकहरु

समाचार स्वास्थ्य

पत्रकार प्रदीप युआरएल पुरस्कारबाट सम्मानित

'पत्रकार जगतले निर्वाह गर्ने भूमिका महामारी र महासंकटमा अझै बढि हुन्छ' : प्रा.डा.श्रेष्ठ

पोखरा । पत्रकार प्रदीप पौडेल युआरएल पत्रकारिता पुरस्कार २०७७ बाट सम्मानित हुनु भएको छ । गण्डकी प्रदेशकै पहिलो रेफरेन्स ल्याब युनाइटेड रेफरेन्स ल्याबोरेटरी प्रालि (युआरएल) को सातौं वार्षिकोत्सवको अवसरमा मंगलबार आयोजित कार्यक्रममा पत्रकार पौडेललाई नगद २० हजार, ताम्रपत्र र दोसल्लासहित सम्मान गरिएको हो ।

गण्डकी मेडिकल कलेज(जिएमसी)का प्रिन्सिपल प्राडा रवीन्द्रप्रसाद श्रेष्ठ, युआरएलका प्रबन्ध निर्देशक ठाकुरप्रसाद पन्त र नेपाल पत्रकार महासंघ कास्की अध्यक्ष दीपेन्द्र श्रेष्ठले पौडेललाई सम्मान गर्नुभएको थियो । पत्रकार पौडेल रेडियो बाराही र इमेज टेलिभिजनमा आवद्ध हुनुहुन्छ ।

जिएमसीका प्रिन्सिपल श्रेष्ठले प्रेस जगतले निर्वाह गर्ने भूमिका महामारी, महासंकट र महाविपत्तिमा अझै सशक्त र जिम्मेवारपूर्ण हुने विचार व्यक्त गर्नुभयो । उहाँले विरामी खर्चकै अभावमा उपचारबाट बञ्चित हुनुपर्ने अवस्था आउन नदिन सबै पक्ष जिम्मेवारी बन्नुपर्नेमा जोड दिनुभयो ।

नेपाल पत्रकार महासंघ कास्की अध्यक्ष दीपेन्द्र श्रेष्ठले विभिन्न संघ, संस्थाले यसरी प्रदान गर्ने पुरस्कारले क्रियाशील पत्रकारहरुमा ऊर्जा थपिने र अझ जिम्मेवार हुन प्रोत्साहन मिल्ने बताउनुभयो ।

प्रतिभा छनोट समिति संयोजक रवीन्द्र बास्तोलाले स्वास्थ्यबारे सर्वसाधारणलाई सचेत बनाउन र यो क्षेत्रमा हुने कमी, कमजोरीलाई सच्याउन पत्रकारिता जगतको अहम् भूमिका रहेको बताउनुभयो । करिब डेढ दशकदेखि पत्रकार पौडेलले यस्तै भूमिका निर्वाह गर्दै आएकोले पुरस्कारका लागि छनोट गरिएको संयोजक बास्तोलाले जानकारी दिनुभयो । प्रतिभा छनोट समितिका सदस्यहरुमा वरिष्ठ मुटुरोग विशेषज्ञ डा. माधव तिवारी र इन्सेक गण्डकी प्रमुख शिव खकुरेल हुनुहुन्थ्यो ।

रेडियो बाराहीका प्रबन्ध निर्देशक रमेश पौडेलले नागरिक पत्रकारिता मौलाउँदै गरेको यो युगमा मिडियाको दायित्व र भूमिका अझ गहन र गम्भीर भएको बताउनुभयो । पुरस्कृत पत्रकार प्रदीप पौडेलले पुरस्कारले आफूमा ऊर्जा थपेको र थप जिम्मेवारीबोध गराएको उल्लेख गर्नुभयो ।

युआरएलका प्रबन्ध निर्देशक ठाकुरप्रसाद पन्तले युआरएलले ७ वर्षको अवधिमा करिब एकसय वटा स्वास्थ्य शिविर गरी सर्वसाधारणलाई सचेतनासहित निशुल्क सेवासमेत प्रदान गरेको जानकारी दिनुभयो । प्रबन्ध निर्देशक पन्तले भन्नुभयो–‘सामाजिक उत्तरदायित्व वहन गर्दै हामी गुणस्तरीय सेवा सर्वसाधारणसम्म पु¥याउन प्रतिवद्ध छौं ।’

प्रबन्ध निर्देशक पन्तले चाडै युआरएलले स्याङ्जाको वालिङ र लमजुङको वेशीसहरमा शाखा विस्तार गर्न लागेको जानकारीसमेत दिनुभयो । उहाँले गण्डकी प्रदेशभर कुनै न कुनै माध्यमले सेवा विस्तार गरी सर्वसाधारणलाई गुणस्तर सेवा दिने संस्थाको मुख्य उद्देश्य रहेको खुलाउनुभयो ।

सञ्चारकर्मी एवम् गायक सन्तोष बस्यालले युआरएलले यो पुरस्कार हरेक वर्ष गण्डकी प्रदेशमा स्वास्थ्य क्षेत्रमा क्रियाशील एक पत्रकारलाई प्रदान गर्दै आईरहेको बताउनुभयो । यसअघि यो पुरस्कारबाट ऋषि खतिवडा, यदुनाथ बञ्जारा र सुरेन्द्र पौडेल सम्मानित भईसक्नु भएको छ ।

प्रतिक्रिया