News Portal

ताजा शिर्षकहरु

चर्चित शिर्षकहरु

प्रमुख समाचार राजनीति

‘काँग्रेसमाथि हात हाल्न खोजे तरुण चुप लागेर नबस्ने र रगतको खोलो बग्ने’: तरुण नेता सुरजजङ्ग

बुल्दीखोलाको पुल उद्घाटन, पोखरामा तरुण दलको शक्ति प्रदर्शन

पोखरा । अन्ततः नेपाली काँग्रेसका वरिष्ठ नेता रामचन्द्र पौडेलले आज बुल्दीखोलाको पुल उद्घाटन गरेका छन् । हिजो जिल्ला प्रशासन कार्यालय तनहुँले निषेधाज्ञा जारी गर्दै धरपकड गरी पुल उद्घाटन गर्न रोकेको थियो । आज हजारौं कार्यकर्ताहरु जम्मा भएर नाराबाजी सहित सो पुल उद्घाटन गर्न गएका थिए ।

हिजो बुधबार पुल उद्घाटन गर्न गएका वरिष्ठ नेता पौडेललाई सुरक्षाकर्मीहरुले अमानवीय ढंगले पक्राउ गरी ३ घण्टासम्म नियन्त्रणमा लिएका थिए । यस विषयमा हिजो बेलुका नै नेपाली काँग्रेसका सभापति शेरबहादुर देउवाले आपत्ति जनाउँदै विरोध गरेका थिए ।

नेपाली काँग्रेस निकट तरुण दलका युवाहरुको व्यापक उपस्थितिका बिचमा नेता पौडेलले पुल उद्घाटन गरिरहँदा यता पोखरामा पनि तरुण दलले आफ्नो शक्ति प्रदर्शन गरेको थियो । नेपाली काँग्रेस कास्कीको पार्टी कार्यालयबाट निस्किएको तरुणहरुको जुलुश विपिचोकस्थित विश्वेश्वरप्रसाद कोइरालाको शालिक परिक्रमा गर्दै महेन्द्रपुलमा पुगी कोणसभामा परिणत भएको थियो ।

काँग्रेसका वरिष्ठ नेता शुक्रराज शर्मा, पूर्वमन्त्री यज्ञबहादुर थापा, कास्की काँग्रेस सभापति कृष्ण केसी, महिला नेतृ वृन्दा राना, महिला नेतृ लक्ष्मी पाण्डे, तरुण दलका नेता सुरजजङ्ग राणा, युवा नेताहरु सरोज केसी, भानु ढकाल, तरुण दल कास्कीका सहसचिव पुजन थकाली लगायतका नेताहरुको सहभागितामा तरुण दलले आफ्नो शक्ति प्रदर्शन गरेको थियो । नेपाली काँग्रेसका वरिष्ठ नेता रामचन्द्र पौडेल माथि हिजो तनहुँमा सुरक्षा निकायले गरेको धरपकड र गिरफ्तारीको विरोधमा पोखरामा नेपाली काँग्रेसका नेता तथा तरुण दलका युवाहरु सडकमा उत्रिएका हुन् ।

कोणसभामा बोल्दै काँग्रेसका वरिष्ठ नेता शुक्रराज शर्माले लोकतन्त्रको रक्षाका लागि काँग्रेस सशक्त रुपमा अघि बढ्न आग्रह गरे । वरिष्ठ नेता शर्माले भने–‘दुई तिहाईको कम्युनिष्ट सरकारको दम्भका कारण लोकतन्त्र गुम्दैछ, यसलाई ठेगान लगाउन मानवअधिकारका सवालमा कटिवद्ध र प्रतिवद्ध भएर काँग्रेस अघि बढ्नुपर्छ ।’

पोखराको महेन्द्रपुलमा आयोजना गरिएको कोणसभालाई सम्बोधन गर्दै तरुण दलका नेता सुरजजङ्ग राणाले नेपाली काँग्रेसलाई नजिस्क्याउन कम्युनिष्ट सरकारलाई चुनौंती दिएका छन् । कोणसभालाई सम्बोधन गर्दै तरुण दलका नेता राणाले नेपाली काँग्रेसमाथि हात हाल्न खोजे तरुण चुप लागेर नबस्ने र रगतको खोलो बग्ने चुनौंती दिएका हुन् ।

प्रतिक्रिया