पोखरा । जिल्ला प्रहरी कार्यालय कास्कीले करणी गर्ने र मानव बेचबिखन तथा ओसारपसारमा संलग्न दुईजनालाई पक्राउ गरेको छ । ७१ वर्षीय वृद्धलाई करणी गरेको अभियोगमा कास्की प्रहरीले पोखरा महानगरपालिका वडा नं. १९ पुरन्चौर बस्ने वर्ष ३४ का घनश्याम गिरीलाई मंसिर १० गते पक्राउ गरेको प्रवक्ता तथा सुचना अधिकारी प्रहरी नायव उपरीक्षक सुवास हमालले जारी विज्ञप्तिमा उल्लेख छ ।

गिरीले राति १० बजेको समयमा एकल वृद्ध महिला आफ्नै घरमा सुतिरहेको अवस्थामा जबरजस्ती भित्र पसी करणी गरेको जाहेरीको आधारमा प्रहरीले पक्राउ गरेको हो । जबरजस्ती करणी उद्योग कसुरमा जिल्ला अदालत कास्कीबाट ७ दिनको म्याद थप गरी प्रहरीले अनुसन्धान प्रक्रिया अगाडि बढाएको छ ।

त्यसैगरी, मानव बेचबिखन तथा ओसारपसारमा संलग्न भएको अभियोगमा प्रहरीले पोखराको जाल्पारोडस्थित एक खाजा घरका सञ्चालकलाई पक्राउ गरेको छ । काभ्रेपलाञ्चोक पाँचखाल नगरपालिका वडा नं. ३ घर भई हाल पोखरा वडा नं. ९ स्थित खाजाघर सञ्चालक ३४ वर्षीय केशव भुजेललाई जिल्ला प्रहरी कार्यालय कास्कीको टोलीले मंसिर ११ गते पक्राउ गरेको हो ।

विभिन्न प्रलोभनमा पारी खाजा घरमा राम्रो काममा लगाई दिन्छु भन्दै बोलाएर सुरुमा राम्रै बोलिव्यवहार गर्ने र खाजा नास्ता वितरणको काममा लगाई सकेपछि एक÷दुई दिनपछि देहव्यापारमा लगाएर यौन शोषण गर्ने उजुरीको आधारमा भुजेललाई पक्राउ गरिएको हो ।

भुजेलले आफ्नो खाजाघरमा काम गर्न राखेका युवती तथा महिलालाई त्यहाँ आउने ग्राहकहरुसँग पैसा लिई डरधाक, धम्की देखाई जबरजस्ती शारीरिक सम्पर्क गर्न लगाउने र अन्यत्र होटलहरुमा समेत बाध्य पारी पठाउने गरेको सूचनाका आधारमा प्रहरीले छापा मारेको हो । कास्की प्रहरीले पीडित महिलालाई मनोपरामर्श गरी आफन्तको जिम्मा लगाएर पठाएको डिएसपी तथा प्रवक्ता हमालले जारी गरेको विज्ञप्तिमा उल्लेख छ । पक्राउ परेका भुजेललाई मानव वेचबिखन तथा ओासारपसार सम्बन्धि कसुर अन्तर्गत १० दिनको म्याद थप गरी अनुसन्धान गरिरहेको छ ।