पोखरा, २७ असार । कास्की जिल्ला प्रहरीले अनलाइन जुवा तथा सट्टेबाजी सञ्चालन गर्ने एक सक्रिय गिरोहलाई पक्राउ गरेको छ। प्रहरीले पोखरा महानगरपालिका वडा नं. १८ सेदीस्थित जीवन श्रेष्ठको घरबाट ८ जनालाई पक्राउ गरेको हो।

असार २६ गते बिहान ८ बजेतिर गोप्य सूचनाको आधारमा गण्डकी प्रदेश प्रहरी कार्यालय, नेपाल प्रहरी प्रदेश कार्यालय पोखरा, जिल्ला प्रहरी कार्यालय कास्की र वडा प्रहरी कार्यालय बैदामबाट खटिएको संयुक्त टोलीले उक्त घरमा छापा मारेको थियो। चेकजाँच गर्दा अनलाइन गेम तथा सट्टेबाजी खेलाईरहेको अवस्थामा उनीहरूलाई पक्राउ गरिएको जिल्ला प्रहरी कार्यालय कास्कीका प्रमुख एसपी नबिन कार्कीले जानकारी दिएका छन् । प्रहरीका अनुसार प्रारम्भिक अनुसन्धानका क्रममा २० करोड भन्दा बढिको कारोबार भएको देखिएको छ ।

पक्राउ पर्ने व्यक्तिहरूमा जिल्ला दार्चुला घर भई हाल पोखरा महानगरपालिका वडा नं. १८ सेदी बस्ने ३१ वर्षीय दिनेश सिंह बोहोरा, भारतको भुपा मानपुर स्थायी वतन भई हाल पोखरा महानगरपालिका वडा नं. १८ सेदी बस्ने ३४ वर्षीय सत्यम सिंह (मुख्य सञ्चालक),सोही ठेगानामा बस्ने २४ वर्षीय हर्ष उम्रेटे, सोही ठेगानामा बस्ने २३ वर्षीय विशाल चाउड, सोही ठेगानामा बस्ने २२ वर्षीय जमान सिंह तमार, पोखरा महानगरपालिका वडा नं. १८ सेदी बस्ने २७ वर्षीय विक्रान सिंह, सोही ठेगानामा बस्ने २६ वर्षीय अजितेश कुमार मिश्र र सोही ठेगानामा बस्ने २४ वर्षीय सत्यम राजपूत रहेका छन् ।

प्रहरीले घटनास्थलबाट ७ थान विभिन्न कम्पनीका ल्यापटप, ६ थान मनिटर, ३१ थान मोबाइल फोन, १ थान किबोर्ड, ४ थान मिनिटप्लक, १ थान १२ भोल्ट ब्याट्री, १ थान युपिएस, २ थान राउटर, १६ थान विभिन्न चार्जर र ३४ थान भारतीय सिमकार्ड बरामद गरेको छ।

अनुसन्धान अनुसार, गिरोहले गत वैशाख १८ गते देखि उक्त ७ कोठे घर भाडामा लिएर सञ्चालन गर्दै आएको थियो। टेलिग्राम र व्हाट्सएप ग्रुपहरूमार्फत ‘नगचगदजबष्२४७.उचय’ लिङ्क पठाएर मानिसहरूलाई आकर्षित गर्ने, डिपोजिट गराउने र क्रिकेट, फुटबल तथा क्यासिनोमा सट्टेबाजी गराउने गरेको पाइएको छ।

उनीहरूले दैनिक ३ देखि ४ लाख भारतीय रुपैयाँसम्म कमाउने गरेको, भारतीय बैंक खाताहरू भाडामा प्रयोग गर्ने र अनलाइनबाटै कारोबार गर्ने गरेको प्रारम्भिक अनुसन्धानले देखाएको छ। यो सञ्जाल भारतबाट सञ्चालित मुख्य गिरोहको २७ औं ब्रान्चको रूपमा सञ्चालन हुँदै आएको थियो। जिल्ला प्रहरी कार्यालय कास्कीले पक्राउ परेकाहरूमाथि थप अनुसन्धान तथा आवश्यक कानुनी कारबाही अघि बढाएको छ।