पोखरा, २५ असार । कास्की प्रहरीले पोखराबाट लागूऔषध ब्राउनसुगरसहित एक जनालाई पक्राउ गरेको छ। लागू औषधको कारोबार भइरहेको विशेष सूचनाका आधारमा खटिएको प्रहरी टोलीले बिहीबार साँझ पोखरा महानगरपालिका–१८, सेदीबाट अर्घाखाँचीका २५ वर्षीय हरिबहादुर घर्तीलाई नियन्त्रणमा लिएको हो।

वडा प्रहरी कार्यालय बैदाम र लागू औषध नियन्त्रण ब्युरो पोखराबाट संयुक्त रूपमा खटिएको प्रहरी टोलीले शंकास्पद अवस्थामा रहेका घर्तीलाई नियन्त्रणमा लिई खानतलासी गर्दा उनको साथबाट १ ग्राम ९०० मिलिग्राम ब्राउनसुगर (खैरो हिरोइन) जस्तो देखिने पदार्थ बरामद गरेको थियो। प्रहरीले उनको साथबाट एक थान मोबाइल समेत बरामद गरेको छ।

पक्राउ परेका घर्ती अर्घाखाँचीको सितागंगा नगरपालिका–२ का स्थायी बासिन्दा हुन् र हाल पोखरामा पर्यटकका रूपमा आएका थिए।

घटनाको पुष्टि गर्दै जिल्ला प्रहरी कार्यालय कास्कीका सूचना अधिकारी तथा प्रहरी नायव उपरीक्षक (डीएसपी) वीरेन्द्र कुमार पासवानले पक्राउ परेका घर्तीलाई कास्की जिल्ला अदालतबाट लागूऔषध सम्बन्धी कसुरमा ६ दिनको म्याद थप गरी अनुसन्धान प्रक्रिया अगाडि बढाइएको जानकारी दिएका छन्। प्रहरीले यस घटनामा थप संलग्नता र कारोबारको सञ्जालबारे अनुसन्धान भइरहेको जनाएको छ।