पोखरा, २५ चैत । पोखराको व्यस्त बजार क्षेत्र नजिकै खुकुरी प्रहार गरी एक ४२ वर्षीया महिलाको हत्या भएको छ । पोखरा–५ मालेपाटन घर भएकी सिर्जना पौडेल केसीको आज बुधबार राती ७ बजे हिडेर घर आउँदैं गर्दा खुकुरी प्रहार गरी हत्या गरिएको हो । मालेपाटनमा घर भएपनि उनी खपौंदीस्थित आफ्नै अर्को घरमा बस्दैं आईरहेकी थिईन् ।

स्वर्गीय श्रीमान् कृष्ण केसीका साथमा मृतक सिर्जना । श्रीमान् कृष्णको एकवर्ष अघि विष सेवन गरेर घरमैं मृत्यु भएको थियो । फाईल तस्विर ।

पृथ्वीचोकमा पसल सञ्चालन गर्दै आईरहेकी सिर्जना एकल महिला हुन् । प्रहरीका अनुसार, आज राति ७ बजे पौडेल सभागृहचोकबाट सृजनाचोकतर्फ आउँदै गर्दा शिवालय चोकतर्फ जाने गल्लीको कर्नरमा पुग्दा अज्ञात व्यक्तिले टाउकोमा खुकुरी प्रहार गरेको थियो ।

गम्भीर घाइते अवस्थामा उनलाई तत्काल गण्डकी मेडिकल कलेज (जिएमसी) पुर्‍याइएको थियो, जहाँ उपचारका क्रममा उनको मृत्यु भएको अस्पताल स्रोतले जनाएको छ । घटनापछि आक्रमणकारी फरार भएका छन् भने घटनास्थलमा पुगेको प्रहरी टोलीले प्रमाण संकलन र हत्यामा संलग्नहरुको खोजी भइरहेको जनाएको छ ।

प्रहरीले परिवारका सबै सदस्य र मृतकसँग निकट रहेका व्यक्तिहरुसँग सोधपुछ र अनुसन्धान जारी राखेको छ । प्रहरीका अनुसार हत्यामा संलग्न युवाको सिसिक्यामेरा फुटेज र हुलिया प्राप्त भएको छ ।

सिर्जना केसी (हत्या गरिएकी महिला)

मृतक सिर्जनाकी एक ३ वर्षीय छोरीमात्र छिन् । उनी कान्छी श्रीमती हुन् भने जेठी श्रीमती र श्रीमानको मृत्यु भईसकेको छ । जेठीपट्टि एक छोरा र दुई छोरी छन् । उनीहरु हजुरबुबाहजुरआमासँग मालेपाटनस्थित घरमा बस्दैं आईरहेका छन् ।

-घटनाको विस्तृत विवरण हामी पछि उपलब्ध गराउने छौं ।