लमजुङ, २१ चैत । लमजुङको मर्स्याङ्दी गाउँपालिका–७ उस्ताबेंसीमुनि शनिबार अपराह्न बोलेरो जिप दुर्घटना हुँदा दुई जनाको मृत्यु भएको छ भने १२ जना घाइते भएका छन् ।

बेंसीसहरबाट मर्स्याङ्दी–७ छिनखोलातर्फ जाँदै गरेको ग १ ज ६४७० नम्बरको यात्रुबाहक जिप अपराह्न साढे ४ बजेतिर उकालोको घुमाउरो सडकमा अनियन्त्रित भएर करिब ४०–५० मिटर तल खसेको प्रहरीले जनाएको छ ।

दुर्घटनामा परी मर्स्याङ्दी–७ उस्ताकी ४० वर्षीया त्रिवेणी घले र ३५ वर्षीया पुष्पा घलेको मृत्यु भएको छ । उनीहरूलाई उपचारका लागि बेंसीसहरस्थित प्रदेश अस्पताल लमजुङ लगिए पनि चिकित्सकले मृत घोषणा गरेका थिए ।

जिल्ला प्रहरी कार्यालय लमजुङका प्रहरी निरीक्षक ज्ञानेन्द्रबहादुर क्षेत्रीका अनुसार घाइतेमध्ये तीन जनाको अवस्था गम्भीर छ । उस्ताकै ४० वर्षीया विमलादेवी घले, ३३ वर्षीया रिता गुरुङ र ७ वर्षीय सफल गुरुङलाई थप उपचारका लागि चितवन मेडिकल कलेज रिफर गरिएको छ ।

अन्य घाइतेहरूमा ६२ वर्षीय सन्तबहादुर घर्ती, २९ वर्षीय चालक करण अधिकारी, ४८ वर्षीय रुद्रमान घले, १० वर्षीया प्रिशिका गुरुङ र ३८ वर्षीय सोमलाल तामाङको अवस्था मध्यम रहेको छ । यस्तै ३१ वर्षीय प्रकाश गुरुङ, १४ वर्षीय विमान घले, ९ वर्षीय इन्द्र घले र ११ वर्षीय रितेश गुरुङको अवस्था सामान्य छ ।

घाइते सबैको उपचार बेंसीसहरस्थित प्रदेश अस्पताल लमजुङमा भइरहेको छ । प्रहरीले दुर्घटनाको कारणबारे अनुसन्धान गरिरहेको जनाएको छ ।