काठमाडौं, १४ चैत । नेकपा (एमाले) का अध्यक्ष तथा पूर्वप्रधानमन्त्री केपी शर्मा ओलीको पक्राउको विरोधमा पार्टीका कार्यकर्ताहरू देशव्यापी रूपमा सडकमा उत्रिएका छन् । शनिबार पोखराको पृथ्वीचोकमा एमाले कार्यकर्ताहरूले कार्की आयोगको प्रतिवेदन जलाएर विरोध जनाएका थिए भने काठमाडौंमा प्रदर्शन उग्र बन्दै गएको थियो ।

प्रदर्शनका क्रममा प्रहरीको लाठीचार्जबाट एमाले कार्यकर्ता युवराज ओलीको टाउको फुटेको छ । सिंहदरबारको दक्षिण गेट नजिक भएको लाठीचार्जमा घाइते भएका उनको अन्नपूर्ण न्युरो अस्पतालमा उपचार भइरहेको छ । घाइते ओलीको टाउकोमा पाँच टाँका लगाइएको छ ।

माइतीघर मण्डलामा एमालेका २३ वटा जनसंगठनहरूले आयोजना गरेको विरोध प्रदर्शनमा कार्यकर्ताहरूले सरकारविरुद्ध नारा लगाएका थिए । उनीहरूले टायर बाल्ने र केही निजी सवारी साधन तोडफोड गर्ने काम पनि गरे । प्रदर्शन बढ्दै जाँदा केही कार्यकर्ता सिंहदरबारको दक्षिण गेटतर्फ पुगेका थिए । त्यहाँ ढुंगामुढा भएपछि प्रहरीले लाठीचार्ज गरेको थियो ।

प्रदर्शनका क्रममा राजु तिवारी, विमल धमला, जगराज शाहीसहित चार जना कार्यकर्तालाई प्रहरीले गिरफ्तार गरेको छ । यसैगरी बबरमहल र सिंहदरबार आसपासबाट थप कार्यकर्ताहरूलाई नियन्त्रणमा लिइएको प्रहरीले जनाएको छ ।

एमाले नेताहरूले सरकारको यो कदमलाई गलत र राजनीतिक प्रतिशोधपूर्ण भनेका छन् । “सरकार सम्भावित अप्रिय घटना हुनुअघि नै सचेत बनोस् । पूर्वप्रधानमन्त्री ओलीलाई तत्काल रिहा गरियोस्,” बस्नेतले भनेका छन् । उनले देशलाई गृहयुद्धतर्फ धकेल्ने प्रयास भइरहेको आरोप लगाएका छन् ।

प्रहरीका अनुसार प्रदर्शनकारीहरूले सिंहदरबार प्रवेश गर्न खोजेपछि सामान्य लाठीचार्ज गरिएको थियो । परिसरका एसपी पवन भट्टराईले स्थिति अहिले सामान्य रहेको बताएका छन् । ओलीको पक्राउलाई लिएर एमालेले आइतबारबाट थप विधिवत विरोध कार्यक्रम गर्ने तयारी गरेको छ ।