पोखरा । प्रतिबन्धित नेपाल कम्युनिष्ट पार्टीका ६ जना कार्यकर्ताहरुलाई लमजुङबाट प्रहरीले बिनाकारण युद्धकालिन शैलीमा गिरफ्तार गरेको भन्दै नेकपा गण्डक ब्यूरोले निन्दा र भत्र्सना गरेको छ । नेकपा गण्डक व्यूरोका ईञ्चार्ज आस्थाले आज एक प्रेस विज्ञप्ति जारी गर्दै गिरफ्तार भएका कार्यकर्ताहरुको विना शर्त तुरुन्त रिहाई गर्न र अन्यथा गम्भिर परिस्थितिको सम्पूर्ण जवाफदेही दलाल सरकार र त्यसका मतियार अनिवार्य हुनुपर्ने चेतावनी दिनुभएको छ ।

गए राती लमजुङको दोर्दी गाउँपालिका पङ्सोरबाट सातौं पार्टी पुनस्र्थापना दिवसको सन्दर्भमा घोषित शान्तिपूर्ण जनभेटघाटको सिलसिलामा रहेको बेला संकटकालका झैं गाउँ नै घेरा हालेर प्रहरीले ६ जना नेताहरुलाई पक्राउ गरेको विज्ञप्तिमा उल्लेख छ ।

प्रहरीले लमजुङ जिल्ला ईञ्चार्ज आक्रोश, सेक्रेटेरी गौरव, रविन्द्र, नारायण, दुर्गा र मंगललाई जिल्ला प्रहरी कार्यालय लमजुङको टोलीले गिरफ्तार गरेको थियो । विज्ञप्तिमा विश्वव्यापी कोरोना महामारी फैलिई रहेको संगिन घडीमा पनि सरकारले आम नेपालीजनको पक्षमा न्यूनतम संवेदनशिलता समेत नदेखाएको आरोप लगाईएको छ । गण्डक व्यूरो ईञ्चार्ज आस्थाले राष्ट्र र जनताप्रतिको दायित्व छोडेर सत्ता स्वार्थको घिनलाग्दो व्यक्ति केन्द्रीत झगडामा व्यस्त रहेको र जनताको सुखदुखमा सँगै रहेको आफ्नो पार्टी (नेकपा)लाई चरम दमन गरेकोप्रति खेद व्यक्त गर्नुभएको छ ।

राज्यको सम्पूर्ण दमन चक्रलाई धज्जी उडाउँदै हाम्रो पार्टी राष्ट्रघाट, जनघात, भ्रष्टाचार, कमिशनखोर र दलालहरुको विरुद्ध निरन्तर जनपक्षीय संघर्ष गर्दै एकीकृत जनक्रान्ति मार्फत् वैज्ञानिक समाजवाद स्थापना गर्ने अभियानमा प्रतिवद्ध रहेको विज्ञप्तिमा उल्लेख छ ।

देश र जनताका जरुर मागहरुलाई राजनैतिक एजेण्डामा उठान गरेको पार्टीलाई दमनद्वारा सिध्याउँछु भन्नु सरकारधारी कथित कम्युनिष्ट अर्थात् केपी, प्रचण्डहरुको दिवा सपना मात्र रहेको ईञ्चार्ज आस्थाले विज्ञप्तिमा उल्लेख गर्नुभएको छ ।