पोखरा । कपिलवस्तुस्थित शिवराज नगरपालिका वडा नं. ९ शिवगढीमा आज व्यापक प्रहरी परिचलान भई घर–घरमा छापा मार्दा गाउँ नै आतंकित बन्न पुगेको छ । जिल्ला प्रहरी कार्यालय कपिलवस्तुका प्रमुख एसपीको कमाण्डमा नै प्रहरी खटिएर आज विहानदेखि घर–घरमा खानतलासी गर्ने र सोधपुछ गर्ने काम प्रहरीले व्यापक रुपमा गरिरहेको गाउँलेहरुले जानकारी दिएका छन् ।

सो गाउँ नेत्र विक्रम चन्द ‘विप्लव’को बसोबास भएको ठाउँ हो । आज विप्लव नेतृत्वको प्रतिबन्धित नेपाल कम्युनिष्ट पार्टीले ७ औं पार्टी पुनर्गठन दिवस मनाईरहेको अवस्थामा प्रहरीले सो गाउँका मानिसहरुलाई नै आतंकित बनाउँदै व्यापक रुपमा खोजतलासी र सोधपुछ गरिरहेको स्थानीयवासीले जानकारी दिएका छन् । अहिलेसम्म प्रहरीले कुनै पनि गाउँलेलाई पक्राउ भने गरेका छैनन् ।