काठमाडौं, २१ फागुन । आज बिहीबार हुने प्रतिनिधिसभा सदस्य निर्वाचनमा मतदाता परिचयपत्र अनिवार्य नभएको निर्वाचन आयोगले स्पष्ट पारेको छ । मतदाता नामावलीमा नाम दर्ता भएका मतदाताले परिचयपत्र नभए पनि छ प्रकारका सरकारी कागजातमध्ये कुनै एकको सक्कलप्रति बोकेर मतदान केन्द्र प्रवेश गरी मताधिकार प्रयोग गर्न सक्नेछन् ।

आयोगका सहायक प्रवक्ता कुलबहादुर जिसीका अनुसार, मतदानका लागि मान्य हुने कागजातहरू यस प्रकार छन्— मतदाता परिचयपत्र, नेपाली नागरिकताको प्रमाणपत्र, सवारी चालक अनुमतिपत्र (ड्राइभिङ लाइसेन्स), राहदानी (पासपोर्ट), राष्ट्रिय परिचयपत्र र जग्गाधनी प्रमाणपुर्जा (लालपूर्जा) । यीमध्ये कुनै एक सक्कल कागजात साथमा नलिई मतदान केन्द्र प्रवेश गर्न नपाइने उनले बताए ।

परिचयपत्र हराएको, नष्ट भएको वा साथमा नभएको अवस्थामा पनि अन्य वैकल्पिक कागजातबाट मतदान गर्न पूर्ण रूपमा सहज बनाइएको आयोगले जनाएको छ । यस व्यवस्थाले मतदातालाई कुनै पनि कारणले मताधिकारबाट वञ्चित हुन नपर्ने विश्वास गरिएको छ ।

यो निर्वाचनमा देशभर १० हजार ९६७ मतदानस्थलहरूमा कुल २३ हजार ११२ मतदान केन्द्र स्थापना गरिएका छन् । यसबाहेक १४३ अस्थायी मतदानस्थल पनि सञ्चालनमा छन् । निर्वाचन आयोगका अनुसार, एक करोड ८९ लाख तीन हजार ६८९ जना मतदाताले आज बिहान ७ बजेदेखि साँझ ५ बजेसम्म मतदान गर्नेछन् ।

मतदातालाई समयमै आफ्नो निर्धारित मतदान केन्द्रमा पुग्न र परिचय खुल्ने सक्कल कागजात अनिवार्य रूपमा बोकेर जान आयोगले आग्रह गरेको छ । मतदान प्रक्रिया सुचारु र शान्तिपूर्ण रूपमा सम्पन्न गर्न सबै तयारी पूरा भएको आयोगले बताएको छ ।