पोखरा, १९ फागुन । निर्वाचन आयोगले सामाजिक सञ्जालमा हुने गतिविधिको कडा निगरानी गरिरहेको छ। सामाजिक सञ्जालको दुरुपयोग गर्ने जो कोही पनि सजायको भागिदार हुनुपर्ने आयोगले स्पष्ट पारेको छ।

कार्यवाहक प्रमुख निर्वाचन आयुक्त रामप्रसाद भण्डारीले भने, ‘निर्वाचनको समयमा उम्मेदवारहरू वा तिनका शुभेच्छुक तथा शुभचिन्तकहरूले विभिन्न हल्ला फैलाउन सक्छन्। यदि यस्ता सामग्रीको दुरुपयोग भयो भने उम्मेदवार र सामाजिक सञ्जाल प्रयोग गर्ने व्यक्ति दुवैलाई सजायको भागिदार बनाइनेछ।’

आयोगले सबै सरोकारवालालाई सचेत रहन आग्रह गरेको छ। सामाजिक सञ्जालमा आउने कुनै पनि समाचार वा सामग्री सही हो वा गलत हो भनी पहिले छुट्याउनुपर्नेमा जोड दिइएको छ।

भण्डारीले थपे, ‘सामाजिक सञ्जालका पेचिला विषयमा हामी सुरुदेखि नै सजग छौं। कसैले गलत उद्देश्यले सामाजिक सञ्जालको प्रयोग गरेर प्रचारप्रसार गरेको पाइएमा त्यस्ता सामग्री हटाउन पटकपटक आग्रह गरिसकेका छौं। विशेष गरी मौन अवधिमा यस्ता सामग्री प्रकाशित भएमा त्यसको स्रोत पत्ता लगाई सम्बन्धित व्यक्तिलाई नै कारबाही गर्ने हाम्रो लक्ष्य छ।’

उनले सबैलाई अनुशासित भएर निर्वाचन प्रक्रियामा सहभागी हुन आह्वान गरे। मौन अवधिलाई पूर्ण रूपमा पालना गर्दै स्वच्छ तथा विवेकपूर्ण तरिकाले मतदान गर्नुपर्ने उनको भनाइ छ।

मतदान आगामी बिहीबार हुँदैछ। निर्वाचन आयोगका अनुसार मतदान सम्पन्न भएपछि जतिसक्दो चाँडो मतपेटिका संकलन गरी मतगणना गर्ने र नतिजा प्रकाशन गर्ने तयारी गरिएको छ।