पोखरा, ५ फागुन । आसन्न प्रतिनिधिसभा सदस्य निर्वाचनलाई बिथोल्ने उद्देश्यले ‘माओवादी कार्यकर्ता हौं’ भन्दै डरधम्की देखाएर गैरकानूनी रूपमा चन्दा संकलन गरिरहेको भन्दैं दुई जनालाई कास्की प्रहरीले पक्राउ गरेको छ।

जिल्ला प्रहरी कार्यालय कास्कीका अनुसार, गोप्य सूचनाको आधारमा नेपाल प्रहरी प्रदेश कार्यालय पोखरा र जिल्ला प्रहरी कार्यालयबाट खटिएको विशेष टोलीले फागुन ३ गते उनीहरूलाई नियन्त्रणमा लिएको हो। पक्राउ पर्नेमा नेपाल कम्युनिस्ट पार्टी (बहुमत) का केन्द्रीय सदस्य ३२ वर्षीय अग्नि भन्ने लक्ष्मण पाण्डे (तनहुँको व्यास नगरपालिका–१३, छाब्दी) र सोही पार्टीका कास्की जिल्ला सेक्रेटरी ३७ वर्षीय भीमसेन परियार (कास्कीको माछापुच्छ्रे गाउँपालिका–२) रहेका जिल्ला प्रहरी कार्यालय कास्कीका प्रवक्ता डीएसपी हरिबहादुर बस्नेतले जानकारी दिएका छन् ।

उनीहरूको साथबाट प्रहरीले नेपाल कम्युनिस्ट पार्टी (माओवादी) गण्डक ब्यूरो लेखिएको रसिदको ठेली (रसिद नम्बर १४२१ देखि १४४० सम्म, जसमध्ये १५ थान अर्धकट्टी विभिन्न व्यक्ति तथा संघसंस्थाको नाममा काटिएका), नेपाल कम्युनिस्ट पार्टी (माओवादी) जिल्ला समिति कास्कीको आर्थिक सहयोगसम्बन्धी पत्र (सेक्रेटरी क. वृन्दाको हस्ताक्षर भएको २० थान), पहेँलो रंगको खाली खाम १५ थान, नगद २३ हजार रुपैयाँ, ‘जातवार्ता आहुति’ लेखिएको पुस्तक १ थान, खैरो रंगको डायरी २ थान र मोबाइल ३ थान बरामद गरेको छ।

प्रहरीले उनीहरूमाथि चन्दा ऐनअन्तर्गत मुद्दा दर्ता गरी कास्की जिल्ला अदालतबाट ५ दिनको म्याद थप लिएर थप अनुसन्धान अघि बढाएको छ। यो घटनाले निर्वाचन नजिकिँदै गर्दा यस्ता अवैध गतिविधि रोक्न सुरक्षा निकायले बढाएको सक्रियताको संकेत गरेको छ।