पोखरा, १६ पुस । पोखराको लिचीबारी जग्गा भ्रष्टाचार प्रकरणमा पूर्व संघीय मामिला तथा सामान्य प्रशासन मन्त्री राजकुमार गुप्ता थुनछेक बहसका लागि विशेष अदालतमा उपस्थित भएका छन् ।

बुधबार विशेष अदालतका न्यायाधीश सुदर्शनदेव भट्ट, डिल्लीरत्न श्रेष्ठ र विदुर कोइरालाको इजलासमा गुप्ताको थुनछेक बहस जारी छ । दुवै पक्षको बहस सुनेपछि इजलासले उनलाई थुनामा राख्ने वा धरौटीमा छोड्ने आदेश जारी गर्नेछ ।

अख्तियार दुरुपयोग अनुसन्धान आयोगले गत असोज २२ गते पूर्वमन्त्री गुप्तासहित ७ जनाविरुद्ध भ्रष्टाचार मुद्दा दायर गरेको थियो । यसै मुद्दामा तत्कालीन नागरिक उन्मुक्ति पार्टीकी अध्यक्ष एवं पूर्वमन्त्री रञ्जिता श्रेष्ठ पनि प्रतिवादी बनाइएकी छिन् ।

दुई पूर्वमन्त्रीबीचको अडियो टेप सार्वजनिक भएपछि अख्तियारले अनुसन्धान अघि बढाएको हो । उक्त अडियोमा बिचौलियाले गुप्तालाई भनेको सुनिन्छ-‘पोखराको जग्गाले तपाईंलाई टुलुटुलु हेरेर बसेको छ, अहिले २५ (लाख) राख्नुस्, काम बनेपछि माझीकुनामा माछा खाऊँला ।’

मुद्दामा पूर्वमन्त्री गुप्ता र श्रेष्ठसहित मालपोत कार्यालय कास्कीका तत्कालीन प्रमुख रामचन्द्र अधिकारी, घरजग्गा व्यवसायी तथा बिचौलिया सुजन लामा (सुजनकुमार तामाङ), खेम पुन (खमबहादुर पुन), यमकुमारी गुरुङ र तुल्सीराम बुढामगरलाई प्रतिवादी बनाइएको छ ।

अख्तियारले यस प्रकरणमा ७८ लाख रुपैयाँ बिगो कायम गरेको छ । यो भ्रष्टाचार प्रकरण पोखरा महानगरपालिका–१६ स्थित दीप विर्ता (लिची बगैँचा) को नक्सा नम्बर २५, २६ र २८ को जग्गासँग सम्बन्धित छ ।