पोखरा, २२ मंसिर । अख्तियार दुरुपयोग अनुसन्धान आयोगले पोखरा क्षेत्रीय अन्तर्राष्ट्रिय विमानस्थल निर्माणमा भएको भनिएको भ्रष्टाचारको मुद्दा आइतबार विशेष अदालतमा् दायर गरे पनि थप तीन छुट्टाछुट्टै विषयमा अनुसन्धान जारी रहेको जनाएको छ ।

अख्तियारले हाल दायर गरेको मुद्दामा ८ अर्ब ३६ करोड रुपैयाँ बिगो दाबी गरिएको छ, जुन लागत अनावश्यक रूपमा बढाइएको शीर्षकमा मात्रै सीमित छ । तर विमानस्थल निर्माणका अन्य गम्भीर अनियमितताका तीन फाइलमा भने छुट्टै अनुसन्धान भइरहेको आयोगले विशेष अदालतलाई पठाएको विवरणमा उल्लेख गरेको छ ।

अनुसन्धान बाँकी रहेका तीन मुख्य विषय:
१. चिनियाँ ठेकेदार कम्पनीलाई दिइएको कर छुट
ठेक्का सम्झौतामा कर तिर्ने पूर्ण दायित्व ठेकेदार कम्पनीको हुने स्पष्ट उल्लेख भए पनि विभिन्न सरकारको पालामा चिनियाँ कम्पनी ऋब्ःऋ लाई कर छुट दिइएको थियो । सार्वजनिक लेखा समितिको प्रतिवेदनअनुसार यो छुट रकम करिब २ अर्ब २० करोड रुपैयाँ छ । लेखा समितिले यसलाई “सरासर भ्रष्टाचार” भनेको थियो । अख्तियारले यो विषयमा छुट्टै अनुसन्धान अधिकृत तोकेर अनुसन्धान अघि बढाएको छ ।

२. छिनेडाँडा–रिट्ठेपानी डाँडा कटानमा भएको ३२ करोड अनियमितता
सम्झौताअनुसार विमानस्थल अगाडिको अवरोध हटाउने र डाँडा कटान गर्ने सम्पूर्ण जिम्मेवारी ठेकेदार कम्पनीको थियो । तर नेपाल नागरिक उड्डयन प्राधिकरण (क्यान) ले ठेकेदारलाई नै ३२ करोड २ लाख रुपैयाँ अतिरिक्त भुक्तानी दिएको थियो । लेखा समितिले यो भुक्तानीलाई “सिधै भ्रष्टाचारजन्य काम” भनेको थियो । अख्तियारले यो विषयमा पनि छुट्टै अनुसन्धान गरिरहेको छ ।

३. परामर्शदाता नियुक्तिमा अनियमितता
ठेक्का सम्झौतामा परामर्शदाता नियुक्तिको खर्च ठेकेदार कम्पनीले नै बेहोर्नुपर्ने प्रावधान थियो । तर प्राधिकरणले आफ्नै बजेटबाट छुट्टै परामर्शदाता नियुक्त गरी करोडौँ रुपैयाँ खर्च गरेको थियो । यो कार्य पनि लेखा समितिले अनियमितता तथा भ्रष्टाचारको श्रेणीमा राखेको थियो । अख्तियारले यसमा पनि छुट्टै अनुसन्धान अघि बढाएको जनाएको छ ।

अख्तियारले विशेष अदालतमा पठाएको लिखित जानकारीमा भनेको छ, ‘प्रस्तुत मुद्दाका फरक–फरक प्रकृतिका, फरक–फरक समयका र फरक–फरक निर्णयकर्ता संलग्न यी विषयहरूमा छुट्टै अनुसन्धान अधिकृत तोकी थप अनुसन्धान भइरहेको छ ।’