पोखरा, २१ मंसिर । पोखरा क्षेत्रीय अन्तर्राष्ट्रिय विमानस्थल निर्माणमा भएको अनियमितता तथा भ्रष्टाचारसम्बन्धी मुद्दामा राष्ट्रिय समावेशी आयोगका पूर्वअध्यक्ष डा. रामकृष्ण तिमिल्सिना पनि मुछिएका छन् ।

अख्तियार दुरुपयोग अनुसन्धान आयोगले डा. तिमिल्सिनासहित तीन जनाविरुद्ध भ्रष्टाचार मुद्दा दायर गर्न विशेष अदालतमा आरोपपत्र पेस गरेको छ । डा. तिमिल्सिना तत्कालीन नेपाल नागरिक उड्डयन प्राधिकरणद्वारा विमानस्थल निर्माणका लागि गठित परामर्शदाता समितिको संयोजक थिए । उनी सर्वोच्च अदालतका पूर्वरजिस्ट्रारसमेत हुन् ।

यसैगरी मुद्दामा मुछिएका अन्य दुई व्यक्ति हुन् :
परामर्शदाता समितिका तत्कालीन सदस्य तथा वरिष्ठ एयरपोर्ट इन्जिनियर डा. पुरुषोत्तम डंगोल
समितिकै अर्का तत्कालीन सदस्य तथा सेवा निवृत्त निर्देशक विनोदानन्द चौधरी (मैथिल बाहुन)

अख्तियार स्रोतका अनुसार यी तीनै जनाले परामर्शदाता छनोट तथा ठेक्का प्रक्रियामा गम्भीर अनियमितता गरेको पाइएको छ । पोखरा विमानस्थल निर्माण चिनियाँ कम्पनी सीएएमसीईलाई ठेक्का दिँदा गुणस्तरहीन सामग्री प्रयोग, लागत अत्यधिक बढाउने र परामर्शदाता छनोटमा मिलेमतो गरेको आरोप उनीहरूमाथि लगाइएको छ ।