पोखरा, १७ कात्तिक । जेन–जी आन्दोलनका क्रममा ध्वस्त भएका प्रहरी कार्यालयहरू पुनर्स्थापना र सवारीसाधन अभावको चुनौतीबीच पोखराको वडा प्रहरी कार्यालय बैदामले तिहारको देउसी–भैलो कार्यक्रमबाट संकलित रकमले मोटरसाइकल खरिद गरेको छ। यसले शान्ति–सुरक्षा कायम गर्न थप सहयोग पुग्ने विश्वास लिइएको छ।

भदौ २३ र २४ गतेको जेन–जी आन्दोलनका क्रममा प्रदर्शनकारीहरूले कास्कीसहित देशभरका २७ वटा प्रहरी कार्यालयमा आगजनी गरेका थिए। प्रहरीका मोटरसाइकल तथा गाडीहरू जलाइएका थिए भने झन्डै दुई दर्जन हातहतियार लुटिएका थिए। यसले प्रहरीलाई गस्ती तथा शान्ति–सुरक्षा कायम गर्न सवारीसाधनको गम्भीर अभाव सिर्जना भएको थियो।

यस्तो प्रतिकूल परिस्थितिमा वडा प्रहरी कार्यालय बैदामले कात्तिक ३ गते लक्ष्मीपूजाको अवसरमा कार्यालय परिसरमा देउसी–भैलो कार्यक्रम आयोजना गरेको थियो। कार्यक्रममा प्रहरी कर्मचारीहरूले नाचगानसमेत प्रस्तुत गरेका थिए। उक्त कार्यक्रमबाट २ लाख २१ हजार ५१४ रुपैयाँ संकलन भएको थियो। कार्यालयले थप केही रकम जुटाएर कुल २ लाख २४ हजार ९७० रुपैयाँमा एक थान मोटरसाइकल खरिद गरेको कास्की प्रहरीका सूचना अधिकारी डिएसपी हरिबहादुर बस्नेतले जानकारी दिए।

देउसी भैलोमा नाच्दैं जिल्ला प्रहरी कार्यालय कास्कीका प्रमुख एसपी नविन कार्कीसहित सुरक्षाकर्मीहरु ।

सोमबार जिल्ला प्रहरी प्रमुख एसपी नवीन कार्कीले उक्त मोटरसाइकल वडा प्रहरी कार्यालय बैदामका प्रमुख डिएसपी नमराज भट्टराईलाई हस्तान्तरण गरेका थिए। कार्यक्रममा कास्कीका प्रमुख जिल्ला अधिकारी रुद्रादेवी शर्मा, एसपी कार्की, पोखराका व्यवसायी, सामुदायिक सेवा केन्द्रका प्रतिनिधिलगायतको सहभागिता थियो।

“देउसी–भैलोबाट संकलित रकम तत्कालै कार्यालय प्रयोजन र शान्ति–सुरक्षाका लागि उपयोग गर्न सकिने भएकाले मोटरसाइकल खरिद गरेका हौं,” डिएसपी बस्नेतले भने।

वडा प्रहरी कार्यालय बैदाममा डीएसपी नमराज भट्टराईसहित सुरक्षाकर्मीहरु देउसीभैलो खेल्दैं ।

थप सहयोगको अपिल
प्रहरी कार्यालयहरूको पुनर्निर्माण, सवारीसाधन व्यवस्थापन र हातहतियार सुरक्षाका लागि विभिन्न सामाजिक संघ–संस्था, क्लब, व्यवसायी तथा दाताहरूसमक्ष सहयोगको अपिल गरिएको छ। “जनताको साथ र सहयोगले मात्र प्रहरीले प्रभावकारी रूपमा शान्ति–सुरक्षा कायम गर्न सक्छ,” प्रहरीले जनाएको छ।