पोखरा, १६ कात्तिक । फेवातालमा आइतबार डुंगा पल्टिएर डुबेका तीन जनालाई नेपाली सेना र सशस्त्र प्रहरीको संयुक्त टोलीले सकुशल उद्धार गरेको छ ।

फेवातालमा दिउँसो अचानक डुंगा पल्टिँदा चालकसहित तीन जना पानीमा खसेका थिए । डुंगामा सवार पोखरा–आमबोटघाटका ४० वर्षीय महेश सुनार, रुपन्देही बुटवल–३ का ४९ वर्षीय सोमबहादुर तामाङ र ४४ वर्षीय लालमान थारू तालमा डुबेका थिए ।

घटनाको खबर पाउनासाथ तत्काल खटिएको नेपाली सेना र सशस्त्र प्रहरीको टोलीले छोटो समयमै उनीहरूलाई जीवितै उद्धार गरेको सशस्त्र प्रहरी नायब उपरीक्षक शैलेन्द्र थापाले बताए । “उद्धार टोली घटनास्थलमा पुग्दा तीनै जना पानीमुनि थिए, तर सबैलाई सकुशल बाहिर निकालियो,” डीएसपी थापाले भने ।

उद्धारपछि तीनै जनालाई स्वास्थ्य जाँचका लागि अस्पताल लगिएको छ । उनीहरूको अवस्था सामान्य रहेको जनाइएको छ । डुंगा पल्टिनुको कारणबारे अनुसन्धान भइरहेको प्रहरीले जनाएको छ ।