पोखरा, १५ कार्तिक । मुस्ताङको ‘हिडन भ्याली’ आसपासमा वर्षा र हिमपातका कारण फसेका तीन बेलायती महिला पर्यटकसहित १५ जनाको टोलीलाई नेपाली सेनाको टोलीले सकुशल उद्धार गरी शुक्रबार जोमसोम ल्याएको छ।

नेपाली सेनाको उच्च शिखर शिक्षालयबाट खटिएको टोलीले धौलागिरि हिमालको आधारक्षेत्र हुँदै मुस्ताङ प्रवेश गर्ने क्रममा सोमबारदेखि थासाङ गाउँपालिका–१ को टुकुचे हिमाल नजिकै फसेका उनीहरूलाई उद्धार गरेको हो। समुद्र सतहबाट ५,१०० मिटर उचाइको ‘हिडन भ्याली’ क्षेत्रमा अलपत्र परेका उनीहरूलाई ४,९०० मिटरको बतासेडाँडाबाट तीन दिनको अथक प्रयासपछि उद्धार गरिएको थियो।

टोलीमा बेलायती पर्यटक मारी रिपी, क्याथरिन विल्सन र इस्माइली जेन तथा हिमालय ट्रेड एन्ड एक्स्पिडिसन ट्राभल एजेन्सीका गाइड र सहयोगी दीर्घलाल लामा, निमाराज लामा, मानध्वज लामा, नवीन लामा, टासी शेर्पा, छिरिङ तामाङ, निमा लामा, काइँला तामाङ, बुद्धराज तामाङ, सोनम तामाङ, कान्छामान तामाङ र दोर्जे तामाङ गरी १२ जना थिए।

हेलिकोप्टर उद्धारको योजना मौसम खराबीले असफल भएपछि सेनाको टोलीले स्थलमार्गबाटै उद्धार गरेको हो। क्षेत्रमा पाँच फिटभन्दा बढी हिउँ जमेको र निरन्तर हिमपात भइरहेकाले उद्धार जटिल बनेको थियो। उद्धारपछि साधारण स्वास्थ्य जाँच गरी नेपाली सेना, नेपाल प्रहरी, सशस्त्र प्रहरी र गैरसैनिक पथप्रदर्शकको संयुक्त टोलीले उनीहरूलाई जोमसोम पु¥याएको जिल्ला प्रहरी कार्यालय मुस्ताङका सूचना अधिकारी सन्तोष बस्यालले जानकारी दिए ।