विराटनगर, १९ असोज । अविरल वर्षाले निम्त्याएको बाढी र पहिरोले इलाम जिल्लामा ठूलो विनाश गरेको छ । जिल्लाका ७ स्थानीय तहमा मात्रै ३७ जनाले ज्यान गुमाएका छन् । अझै १ जना बेपत्ता छन् भने २० जना घाइते भएका छन् । जिल्ला प्रशासन कार्यालय विराटनगरका प्रमुख जिल्ला अधिकारी सुनिता नेपालका अनुसार, यो घटना राति भएकोले धेरैजसो सुतिरहेका अवस्थामा पुरिएका थिए ।

सबैभन्दा बढी क्षति देउमाई नगरपालिका र माईजोगमाई गाउँपालिकामा भएको छ, जहाँ ८–८ जनाको मृत्यु भयो । इलाम नगरपालिका र सन्दकपुर गाउँपालिकामा ६–६ जना, सूर्योदय नगरपालिकामा ५ जना, माङ्सेबुङ गाउँपालिकामा ३ जना र फाकफोकथुम गाउँपालिकामा १ जनाको ज्यान गएको छ । मृतकमध्ये १७ पुरुष र २० महिला छन् । बेपत्ता व्यक्ति इलाम नगरपालिकाकै हुन् ।

प्रजिअ नेपालसँग गरिएको कुराकानीमा उनले भनिन्, “तयारी त थियो, तर राति सुतिरहेका बेला घटना भयो । जोखिम क्षेत्र नभएका ठाउँहरूमा पनि पहिरो गयो, जसले क्षति बढायो ।“ सदरमुकाम नजिकै पनि १३ ठाउँमा पहिरो गएको उल्लेख गर्दै उनले थपिन्, “अहिले पानी रोकिएको छ, तर सतर्क रहनुपर्छ ।“

नेपाल प्रहरी, सशस्त्र प्रहरी र स्थानीयहरू उद्धारमा जुटेका छन्, तर वर्षा र विकट भूगोलले काम कठिन बनेको छ । सडकहरू ठूलो पहिरोले अवरुद्ध छन्, राजमार्ग पनि खुल्न सकेका छैनन् । पालिकाहरूले जोखिममा परेका परिवारलाई सुरक्षित स्थानमा सारेर खानपानको व्यवस्था गरिरहेका छन् ।

प्रजिअ नेपालले क्षतिको पूर्ण विवरणका लागि पालिकाहरूलाई निर्देशन दिएको बताइन् । भोलिबाट रेडक्रस, प्रहरी र पालिका टोलीले सर्वेक्षण सुरु गर्नेछन् । यसका आधारमा राहत र पुनस्र्थापनाको योजना बनाइनेछ ।