काठमाडौं, ७ असोज । जेन–जी आन्दोलनपछिको प्रदर्शनमा प्रहरी सहायक निरीक्षक मिलन राय, प्रहरी जवान उत्तम थापा र प्रहरी सहायक हवलदार अमृत गुरुङले ज्यान गुमाए। आर्थिक अभावका कारण यी मृतक प्रहरीका परिवारले सापटी लिएर अन्तिम संस्कार गर्नुपरेको छ।

मिलन रायको परिवारको पीडा
सिन्धुलीको दुधौली–८ का मिलन रायले सानैमा बाबुआमा गुमाएका थिए। काकाको सहारामा हुर्किएका उनले चार महिनाअघि श्रीमतीलाई जापान पठाउन ऋण लिएका थिए। अहिले परिवारले महिनाको ४० हजार किस्ता तिर्दैछ। काठमाडौंको पशुपति आर्यघाटमा उनको अन्तिम संस्कारका लागि प्रहरी कल्याण कोषबाट ४० हजार प्राप्त भए पनि कुल खर्च साढे दुई लाख पुग्यो। यो रकम गाउँघरबाट सापटी लिएर जुटाइएको काका केशव रायले बताए।

उत्तम थापाको परिवारको कथा
दार्चुलाका उत्तम थापाको परिवार पनि आर्थिक संकटमा छ। उनको शव गाउँ लैजान नसकेर पशुपति आर्यघाटमै अन्तिम संस्कार गरियो। प्रहरी कल्याण कोषबाट ४० हजारबाहेक अन्य सहयोग नपाएको परिवारले जनायो। सात महिनाअघि भाइको मृत्यु भएपछि उत्तमकी आमा एक्ली छिन्। उनको जागिरले नै घर चल्थ्यो। अहिले अन्तिम संस्कारको खर्च काकाहरूको सहयोगमा जुटाइएको छ।

अमृत गुरुङको परिवारको अवस्था
कास्कीका अमृत गुरुङको परिवारले पनि सापटी लिएर अन्तिम संस्कार गरेको छ। गुरुङ समुदायको रीतिअनुसार अझै केही संस्कार बाँकी छ। हालसम्म एक लाख खर्च भएको र यो रकम छिमेकीबाट सापटी लिएको उनकी श्रीमती शान्तिले बताइन्। अमृत परिवारका एक्ला छोरा थिए। उनकी आमाको नौ महिनाअघि मृत्यु भएको थियो र परिवारमा अझै ऋणको बोझ छ।

प्रहरी प्रधान कार्यालयले मृतकका परिवारलाई १० लाख सहयोग दिने निर्णय गरे पनि रकम उपलब्ध भएको छैन। मृतकका आफन्तले गृहमन्त्रीलाई भेटेर सहयोगको माग गरेका छन्। जेन–जी आन्दोलनका पीडित परिवार संर्घष समितिका संयोजक कमल सुवेदीले किरिया खर्च तुरुन्तै उपलब्ध गराउनुपर्ने बताए। गृह मन्त्रालयले भने जिल्ला प्रशासनमार्फत सहयोग प्रक्रिया अघि बढाएको जनाएको छ।