दुई हटलाइन नम्बर (०१–५९७९२२३ र ०१–५९७९२२४) जारी गर्दै सहयोगका लागि सम्पर्क गर्न आह्वान

काठमाडौं, २४ भदौं। जेनजी युवाको भ्रष्टाचारविरोधी प्रदर्शनपछि देशभर उत्पन्न अराजक परिस्थितिलाई नियन्त्रण गर्न नेपाली सेनाले सक्रिय पहल थालेको छ। मंगलबार राति १० बजेदेखि शान्ति र सुरक्षा कायम गर्न सेना देशभर परिचालन भएको छ। सेनाले अराजक गतिविधि रोक्न कडा चेतावनी दिँदै जनताको सुरक्षाका लागि दृढतापूर्वक खटिने प्रतिबद्धता जनाएको छ।

सैनिक मुख्यालय जंगीअड्डामा मध्यराति जेनजी प्रतिनिधिहरूसँग प्रारम्भिक छलफलको तयारी भइरहेको सैनिक स्रोतले पुष्टि गरेको छ। स्रोतका अनुसार, प्रधानसेनापति अशोकराज सिग्देलसँग भेटेर जेनजी अभियन्ताहरूले आफ्ना माग र धारणा राख्ने छन्। एक अभियन्ताले जंगीअड्डाबाट छलफलको लागि बोलाएको र सेनाका कुरा पनि सुन्न तयार रहेको बताए। यद्यपि, सेनाका एक उच्च अधिकृतले यो छलफललाई औपचारिक वार्ता नभई जेनजीका माग बुझ्ने प्रारम्भिक प्रयासका रूपमा स्पष्ट पारे। औपचारिक वार्ता भने भोलि राष्ट्रपति रामचन्द्र पौडेलको उपस्थितिमा हुने बताइएको छ।

सोमबारको आन्दोलनमा डेढ दर्जनभन्दा बढी युवाको ज्यान गएपछि मंगलबार प्रदर्शन थप चर्किएको थियो। आन्दोलनका क्रममा शीर्ष नेताहरूको घर, संवैधानिक निकाय, सरकारी कार्यालय र निजी व्यावसायिक भवनहरूमा आगजनी र लुटपाट भएको छ। यस्ता गतिविधि मंगलबार रातिसम्म पनि नरोकिएको सेनाले जनाएको छ।

यसैबीच, नेपाली सेनाले बानेश्वरस्थित राष्ट्रिय वाणिज्य बैंक लुट्ने प्रयास गर्ने पाँच जनालाई पक्राउ गरेको छ। आपराधिक गतिविधि नियन्त्रण गर्न सेनाले देशभर उच्च सतर्कता अपनाएको छ र दुई हटलाइन नम्बर (०१–५९७९२२३ र ०१–५९७९२२४) जारी गर्दै सहयोगका लागि सम्पर्क गर्न आह्वान गरेको छ।