काठमाडौं, २३ भदौ । भ्रष्टाचार विरुद्ध र  सामाजिक सञ्जाल बन्दको विरोधमा भएको प्रदर्शनका क्रममा काठमाडौंमा मात्र १४ जनाको मृत्यु भईसकेको छ ।  देशभरि नैं जेनजी पुस्ताले चर्को रुपमा आन्दोलन अघि बढाईरहेको छ । जेनजी पुस्ता आक्रोशित हुँदा सुरक्षाकर्मीको प्रहारबाट घाइते हुने र गोली लाग्ने क्रम पनि जारी छ ।

जेनजीको ‘शान्तिपूर्ण’ आन्दोलनमा प्रहरी र प्रशासनबाट पनि निरंकुश शैंलीमा शक्तिप्रदर्शन गरिएको छ । जसका कारण सुरक्षाकर्मीबाट चलाइएको गोली लागेर सयौं मानिस घाईते भएका छन् र १४ जनाभन्दा बढि युवाहरु मारिएका छन् ।

स्वास्थ्य तथा जनसंख्या मन्त्रालयका अनुसार, उपत्यकाका विभिन्न अस्पतालमा २०० भन्दा बढी घाइतेको उपचार भइरहेको छ। सिभिल अस्पतालमा १००, ट्रमा सेन्टरमा ५०, एभरेष्ट अस्पतालमा २०, केएमसी अस्पतालमा ३५, वीर अस्पतालमा ७ र पाटन अस्पतालमा ४ जनाको उपचार भइरहेको छ।

एभरेष्ट अस्पतालका अधिकारी अनिल अधिकारीले त्यहाँ उपचाररत ४ जना गम्भीर अवस्थामा रहेको बताए। ट्रमा सेन्टरका डा. दीपेन्द्र पाण्डेका अनुसार, ट्रमामा उपचाररत १० जनाको अवस्था गम्भीर छ, जसको टाउको र छातीमा गोली लागेको छ।