पोखरा, १७ भदौ । पोखरा महानगरपालिका वडा नं. ३३, भरतपोखरीस्थित बाघमारामा शुभतारा युवा क्लबको आयोजनामा बाघमारा महोत्सव हुने भएको छ। आगामी भदौ १९ देखि ३० गतेसम्म सञ्चालन हुने यो महोत्सवले स्थानीय कला, संस्कृति, र पर्यटन प्रवद्र्धनमा महत्वपूर्ण योगदान पुर्‍याउने अपेक्षा गरिएको छ। सोमबार आयोजित पत्रकार सम्मेलनमा महोत्सवको उद्देश्य र तयारीबारे जानकारी दिइएको थियो।

पत्रकार सम्मेलनमा क्लबका अध्यक्ष देबेन्द्र सापकोटाको सभापतित्वमा भएको कार्यक्रममा सचिव स्वागत भुसालले सञ्चालन गरेका थिए भने सदस्य पुकार कार्कीले महोत्सवको उद्देश्यबारे प्रष्ट पारेका थिए। कार्यक्रममा बोल्दै वडाध्यक्ष रामचन्द्र अधिकारीले महोत्सवले भरतपोखरीको सांस्कृतिक सम्पदा, स्थानीय भाषा, गीत, नृत्य, परम्परा, र हस्तकलाको संरक्षण र प्रवद्र्धन गर्ने बताए। उनले यो महोत्सवले विभिन्न समुदाय र जनजातिहरूबीच एकता, सहकार्य, र आपसी समझदारी अभिवृद्धि गर्नुका साथै स्थानीय उत्पादन, हस्तकला, परिकार, र पर्यटनलाई बजारसँग जोडेर आर्थिक विकासमा योगदान पुर्‍याउने विश्वास व्यक्त गरे।

वडाध्यक्ष अधिकारीले भने, “यो महोत्सवले खेलकुद, मनोरञ्जन, शिक्षा, स्वास्थ्य, यातायात, सञ्चार, र वातावरण संरक्षणजस्ता विकासका क्षेत्रमा युवाहरूलाई संगठित गरी सहजीकरणको भूमिका खेल्नेछ।” उनले महोत्सवलाई सांस्कृतिक, सामाजिक, आर्थिक, र शैक्षिक दृष्टिकोणले समृद्ध बनाउन आयोजकलाई सुझाव दिए।

महोत्सवमा १४५ स्टल रहने र तीमध्ये ७० भन्दा बढी स्टल बुकिङ भइसकेको क्लबका अध्यक्ष सापकोटाले जानकारी दिए। स्टलहरूमा फेन्सी, गार्मेन्ट, भाँडाकुँडा, कृषि, बैंक तथा वित्तीय सेवा र रेस्टुरेन्टसम्बन्धी प्रदर्शनी हुने छन्। बालबालिकाका लागि बालउद्यान, रत्यौली, र विद्यालयस्तरीय नृत्य प्रतियोगिताजस्ता मनोरञ्जनात्मक कार्यक्रम पनि आयोजना गरिनेछ।

पत्रकार सम्मेलनमा लेखनाथ पत्रकार मञ्चका अध्यक्ष विष्णुहरि पौडेल, निवर्तमान अध्यक्ष कविराज खनाल, स्थापनाकालीन अध्यक्ष भीमपाणि बराल, नेपाल टेलिभिजनका संवाददाता परशुराम शर्मा, पुष्प दाहाल, रेडियो सराङ्गकोटका कमल पौडेल, नेशनल एफएमका सन्दिप पौडेल, र रामशरण नेपालीलगायतका पत्रकारहरूले महोत्सवको उद्देश्य र प्रभावबारे जिज्ञासा राखेका थिए। जवाफमा अध्यक्ष सापकोटाले सांस्कृतिक संरक्षण, सामाजिक एकता, आर्थिक प्रवर्धन, पर्यटन आकर्षण, र शैक्षिक चेतना अभिवृद्धिका लागि महोत्सव आयोजना गरिएको बताउँदै सञ्चारमाध्यमको सहयोगको अपेक्षा गरे।

शुभतारा युवा क्लब २०७० सालमा स्थापना भएको सामाजिक, सांस्कृतिक, र युवा चेतना प्रवद्र्धनमा सक्रिय संस्था हो। स्थापनाकालदेखि नै यो क्लबले स्थानीय समाजको विकास, कला, संस्कृति, खेलकुद, र युवा प्रतिभा प्रवद्र्धनमा निरन्तर योगदान पुर्‍याउँदै आएको छ। यसअघि २०६९ सालमा बरेली युवा क्लबले भरतपोखरी हुँडीकोट महोत्सव आयोजना गरेको थियो।

आयोजकका अनुसार महोत्सव सम्पन्न गर्न करिब ४० लाख रुपैयाँ खर्च हुने अनुमान गरिएको छ। बाघमारा महोत्सवले स्थानीय समुदायलाई एकताबद्ध बनाउन, पर्यटन प्रवद्र्धन गर्न, र आर्थिक गतिविधिलाई प्रोत्साहन गर्न महत्वपूर्ण भूमिका खेल्ने अपेक्षा गरिएको छ।