पोखरा, १२ भदौ । पोखरा अन्तर्राष्ट्रिय विमानस्थल र गौतमबुद्ध अन्तर्राष्ट्रिय विमानस्थलबाट अन्तर्राष्ट्रिय उडान विस्तारको तयारी तीव्र भएको छ। सिचुवान एयरलाइन्सले पोखराबाट छेन्दु हुँदै अष्ट्रेलिया उडानका लागि नेपाल नागरिक उड्डयन प्राधिकरणसँग अनुमति मागेको छ।

प्राधिकरणका सूचना अधिकारी ज्ञानेन्द्र भूलका अनुसार, सेप्टेम्बरबाट उडान सुरु गर्ने योजनासहित अनौपचारिक छलफल भएको छ। औपचारिक प्रक्रिया पूरा भएपछि उडान तालिका पेस हुने अपेक्षा छ। यो उडानले अष्ट्रेलिया आवतजावत गर्ने नेपालीलाई सहज हुने विश्वास छ। सिचुवानले यसअघि २०८० असारमा चार्टर्ड उडानमार्फत पोखरामा सेवा दिएको थियो।

यसैबीच, भूटान एयरलाइन्सले पनि पोखराबाट पारोका लागि सेप्टेम्बर २८ र अक्टोबरमा चार्टर्ड उडानको अनुमति मागेको छ। नियमित उडान सफल भएमा पारो–पोखरा–दिल्ली र दिल्ली–पोखरा–पारो रुटमा ‘फिफ्थ फ्रिडम फ्लाइट’ सञ्चालन गर्ने योजना छ। हाल हिमालय एयरलाइन्सले मात्र पोखरामा हप्तामा एक दिन काठमाडौँ–ल्हासा–पोखरा रुटमा नियमित उडान गरिरहेको छ।

भैरहवास्थित गौतमबुद्ध विमानस्थलमा जजिरा एयरवेज र थाई एयर एसियाले विन्टर सिजनबाट नियमित उडान पुनः सुरु गर्ने तयारी गरेका छन्। थाई एयर एसियाले अक्टोबर २६ बाट हप्तामा दुई उडान गर्ने योजना बनाएको छ। जजिराले यसअघि दुईपटक भैरहवाबाट उडान गरेर स्थगित गरेको थियो। हाल भैरहवामा नेपाल एयरलाइन्सको उडान भने विमान अभावले रोकिएको छ।

पोखरा विमानस्थल २२ अर्ब लागतमा बनेको हो र वार्षिक आठ लाख यात्रुको क्षमता राख्छ। यो विमानस्थल २०७९ पुस १७ मा उद्घाटन भएको थियो। यस्तै, भैरहवा विमानस्थल त्रिभुवन अन्तरराष्ट्रिय विमानस्थल सञ्चालनमा आएको ७१ वर्षपछि सञ्चालनमा आएको हो। सरकारले यी दुवै विमानस्थलमा अन्तर्राष्ट्रिय उडानलाई प्रोत्साहन गर्न ल्यान्डिङ, पार्किङ, न्याभिगेसन र यात्रु सेवा शुल्कमा पूर्ण छुट तथा ग्राउन्ड ह्यान्डलिङमा ७५ प्रतिशत छुट दिएको छ। यो सुविधा २०८१ साउन २८ देखि लागू भएको हो।

नेपालले ४२ मुलुकसँग हवाई सेवा सम्झौता गरेको छ। प्राधिकरणका अनुसार, चार्टर्ड उडानका लागि अनुमति सहज छ, तर नियमित उडानका लागि पोखरा र भैरहवालाई आधार बनाएर थप सम्झौता पुनरावलोकन गरिनेछ। यी उडानहरूले दुवै विमानस्थलको व्यावसायिक उपयोगिता बढ्ने र पर्यटन प्रवद्र्धनमा योगदान पुग्ने अपेक्षा गरिएको छ।