पोखरा, २३ साउन । पोखरा महानगरपालिका र लक्ष्मी ग्रुप फाउन्डेसनबीच वातावरण संरक्षण, ताल सरसफाइ र रोजगारी सिर्जनासम्बन्धी समझदारी भएको छ। बिहीबार भएको समझदारीमा महानगरका प्रमुख धनराज आचार्य र लक्ष्मी ग्रुपका अध्यक्ष गणेशबहादुर श्रेष्ठले हस्ताक्षर गरे।

नगर प्रमुख आचार्यले तालहरूको दिगो संरक्षण, पर्यावरणीय सन्तुलन, पर्यटन प्रवद्र्धन र स्थानीय समुदायको आर्थिक सशक्तीकरणका लागि सीपमूलक तालिम र रोजगारी सिर्जना गर्ने परियोजना सञ्चालन हुने बताए। लक्ष्मी ग्रुपले सामाजिक उत्तरदायित्वअन्तर्गत पोखराको पर्यावरण संरक्षण र सामुदायिक सशक्तीकरणमा सहयोग गर्ने प्रतिबद्धता जनाएको छ।

यो परियोजनाले पोखराका तालहरूमा लेउ र जलकुम्भी नियन्त्रण गरी पर्यावरणीय सन्तुलन कायम राख्ने, जलकुम्भीबाट हस्तकलाका सामग्री उत्पादन र सीप विकासमार्फत रोजगारी सिर्जना गर्ने, गण्डकी बहुप्राविधिक शिक्षालयका विद्यार्थीलाई इन्टर्नसिप र व्यावसायिक प्रशिक्षण प्रदान गर्ने, विपन्न परिवारलाई इन्डक्सन चुलो वितरण र विद्युतीय पूर्वाधार सुधारमा सहयोग गर्ने, जलवायु वित्त र जलवायु न्याय कोषको खोजी गरी विपन्न समुदायलाई सहयोग गर्ने उद्देश्य राखेको आचार्यले बताए।

लक्ष्मी ग्रुपका अध्यक्ष श्रेष्ठले ताल सरसफाइ, जलकुम्भी व्यवस्थापन, हस्तकला उत्पादन, सीप विकास, विद्यार्थीका लागि इन्टर्नसिप र प्रशिक्षण, विपन्न परिवारलाई इन्डक्सन चुलो वितरण र विद्युतीय पूर्वाधार सुधारमा समन्वयात्मक रूपमा काम गर्ने बताए। यसका लागि लक्ष्मी ग्रुपले अत्याधुनिक प्रविधि, वित्तीय स्रोत, उपकरण, प्राविधिक, विज्ञ परामर्शदाता, जनशक्ति, तालिम र विद्युतीय चुल्हो वितरणको व्यवस्था गर्नेछ।

परियोजना ६ महिनाको पाइलट अवधिसहित ५ वर्षसम्म सञ्चालन हुनेछ। प्राविधिक गुणस्तरको नियमित अनुगमन र मूल्याङ्कन गरिनेछ। पहिलो चरणको पाइलट परियोजना ६ महिनाभित्र मूल्याङ्कन गरी प्रभावकारीताका आधारमा फेवाताललगायत अन्य तालहरूमा क्रमशः विस्तार गरिने आचार्यले बताए।

यो परियोजनाले तालहरूको दिगो संरक्षण, फोहोर र प्रदूषण नियन्त्रण, स्थानीय समुदायको आर्थिक सशक्तीकरण, आयआर्जन र जीविकोपार्जनमा सुधार तथा महानगरको प्रथम पञ्चवर्षीय नगर ऊर्जा योजना कार्यान्वयनमा सहयोग पुग्ने विश्वास गरिएको छ।