पूर्व संघीय मामिला मन्त्री राजकुमार गुप्ता, पूर्व भूमि व्यवस्था मन्त्री रञ्जिता श्रेष्ठ, कास्की मालपोत कार्यालयका तत्कालीन प्रमुख रामचन्द्र अधिकारी र मुख्य बिचौलिया सुजन लामासँग पनि अख्तियारले बयान लिइसकेको छ।

काठमाडौं, १४ साउन । अख्तियार दुरुपयोग अनुसन्धान आयोगले पोखरा-१६ बाटुलेचौरस्थित ‘लिची बगान’ को १३५ रोपनी जग्गा हिनामिना प्रकरणमा भूमि व्यवस्था, सहकारी तथा गरिबी निवारण मन्त्रालयका पूर्व सचिव अर्जुनप्रसाद पोखरेलसँग बयान लिएको छ। यो अनुसन्धानअन्तर्गत अख्तियारले मंगलबार पोखरेलसँग सोधपुछ गरेको हो।

बाटुलचौरको १३५ रोपनी जग्गा घुस-प्रकरण

यसअघि, यो प्रकरणमा संलग्न रहेको आरोपमा पूर्व संघीय मामिला मन्त्री राजकुमार गुप्ता, पूर्व भूमि व्यवस्था मन्त्री रञ्जिता श्रेष्ठ, कास्की मालपोत कार्यालयका तत्कालीन प्रमुख रामचन्द्र अधिकारी र मुख्य बिचौलिया सुजन लामासँग पनि अख्तियारले बयान लिइसकेको छ।

हालका भूमि व्यवस्था मन्त्री बलराम अधिकारीले पनि यो गिरोहबाट ३२ लाख घुस लिएको दाबी गरिएको अडियो सार्वजनिक भएको छ, तर उनी अझै मन्त्री पदमा कायम छन्।

अनुसन्धानका क्रममा पोखरेलले जग्गा हिनामिनाका लागि ५ लाख घुस लिएको अडियो सार्वजनिक भएको छ। त्यस्तै, गुप्ताले कास्कीको भूमि समस्या समाधान आयोगको अध्यक्षमा एमाले नेता खेमबहादुर पुनलाई नियुक्त गर्न रकम लिएको अडियो पनि बाहिरिएको छ। गुप्ताले यो नियुक्तिका लागि सुजन लामा र नाउपा अध्यक्ष रञ्जिता श्रेष्ठसँग मन्त्री निवासमै घुसको ‘डिल’ गरेको अडियोमा खुलासा भएको छ। यो प्रकरणपछि गुप्ताले मन्त्री पदबाट राजीनामा दिएका थिए।

हालका भूमि व्यवस्था मन्त्री बलराम अधिकारीले पनि यो गिरोहबाट ३२ लाख घुस लिएको दाबी गरिएको अडियो सार्वजनिक भएको छ, तर उनी अझै मन्त्री पदमा कायम छन्। यो जग्गा हिनामिना र घुस प्रकरणमा संलग्नलाई कारबाही गर्न माग गर्दै यहीं असार १० गते अख्तियारमा उजुरी परेको थियो।