चितवन, १० साउन । नेपाली कांग्रेसका वरिष्ठ नेता, गण्डकी प्रदेशका पूर्वप्रमुख तथा लोकतन्त्रका सच्चा योद्धा पृथ्वीमान गुरुङको निधन भएको छ। ७६ वर्षीय गुरुङको आज बिहान ८ बजे चितवनको भरतपुर महानगरपालिका–२६ स्थित आफ्नै निवासमा निधन भएको हो। लामो समयदेखि क्यान्सर रोगसँग साहसपूर्वक लडिरहेका गुरुङको बिदाइले नेपाली कांग्रेस परिवार र उनका शुभचिन्तकहरू मर्माहत बनेका छन्।

कास्कीको माछापुच्छ्रे गाउँपालिका, ल्वाङघलेलमा वि.सं. २००६ मा जन्मिएका गुरुङ चितवन बसाइँसराइ गरी आएका थिए। उनले आफ्नो जीवन नेपाली कांग्रेसको सिद्धान्त र लोकतान्त्रिक मूल्य–मान्यताप्रति समर्पित गरे। वि.सं. २०४६ को जनआन्दोलनमा परिचालन समितिको सदस्यको रूपमा सक्रिय रहँदै उनले लोकतन्त्र स्थापनामा महत्वपूर्ण योगदान पु¥याएका थिए। नेपाली कांग्रेस चितवनको पूर्वसभापति र प्रजातान्त्रिक कांग्रेसको जिल्ला सभापतिका रूपमा उनले संगठनलाई बलियो बनाउन अथक मेहनत गरे।

वि.सं. २०७८ साउन १२ गते गण्डकी प्रदेशको प्रदेशप्रमुख नियुक्त भएका गुरुङले नवलपरासीको भूमि आयोगको अध्यक्षको जिम्मेवारी पनि कुशलतापूर्वक निर्वाह गरेका थिए। नेपाली कांग्रेस केन्द्रीय सदस्य टेकप्रसाद गुरुङले उनको योगदानको स्मरण गर्दै भने, “पृथ्वीमानजीले सधैं समाज र देशको हितमा आफूलाई समर्पित गर्नुभयो। उहाँको निधनले हामीले एक असल मार्गदर्शक गुमाएका छौं।”

पारिवारिक स्रोतका अनुसार, गुरुङका दुई छोरामध्ये जेठो छोराको यसअघि नै निधन भइसकेको छ। कान्छो छोरा विदेशमा रहेकाले उनको अन्त्येष्टि आइतबार गरिने छ। उनकी श्रीमती र कान्छो छोरालाई यो दुखद घडीमा सम्हाल्ने शक्ति मिलोस् भन्दै शुभचिन्तकहरूले प्रार्थना गरेका छन्।

गुरुङको निधनले नेपाली कांग्रेस र गण्डकी प्रदेशले मात्र नभई सिंगो देशले एक समर्पित व्यक्तित्व गुमाएको छ। उनको लोकतान्त्रिक आन्दोलन र सामाजिक सेवाप्रतिको योगदान सधैं स्मरणीय रहनेछ। प्रहरी र स्थानीय प्रशासनले समेत उनको योगदानको सम्मानमा शोक व्यक्त गरेको छ। यो शोकको घडीमा डन न्यूज परिवार उनको आत्माको चिरशान्तिको कामना गर्दै शोकसन्तप्त परिवारजनप्रति गहिरो समवेदना प्रकट गर्दछ।