पोखरा, २५ असार। गण्डकी प्रदेशको भौतिक पूर्वाधार तथा यातायात व्यवस्था मन्त्रालयमा कार्यरत लेखा अधिकृत झलक शर्मा पौडेलविरुद्ध ६ करोडभन्दा बढीको अकुत सम्पत्ति आर्जनको अभियोगमा भ्रष्टाचार मुद्दा दायर गरिएको छ।

बुधबार अख्तियार दुरुपयोग अनुसन्धान आयोगले विशेष अदालतमा पौडेलविरुद्ध आरोपपत्र पेश गर्दै उनले पदीय हैसियत दुरुपयोग गरी ६ करोड २६ लाख ९३ हजार १२९ रुपैयाँ बराबरको अवैध सम्पत्ति आर्जन गरेको दाबी गरेको हो।

अख्तियारका प्रवक्ता राजेन्द्र कुमार पौडेलका अनुसार, २०५४ साल माघ ८ गते सरकारी सेवा प्रवेश गरेका पौडेलको सम्पत्ति विवरण २०८० कात्तिक १० गतेसम्मको अध्ययन गर्दा स्रोत नखुलेको सम्पत्ति भेटिएको हो।

जाँचका क्रममा पौडेलले गैरकानुनी रूपमा आर्जन गरेको सम्पत्ति पत्नी हुमा कुमारी पौडेलको नाममा राखेर सम्पत्ति विवरणमा उल्लेख नगरेको पाइएको अख्तियारको दाबी छ।

उनीहरू दुवैलाई भ्रष्टाचार निवारण ऐन, २०१७ र २०५९ बमोजिम मुद्दा दायर गर्दै सम्पत्ति जफतसहित कैद सजायको माग गरिएको आयोगले जनाएको छ।