काठमाडौं, १८ असार । काठमाडौं जिल्ला अदालतले पत्रकार दिलभूषण पाठकलाई २५ हजार रुपैयाँ धरौटीमा छाड्न आदेश दिएको छ। न्यायाधीश खेमराज भट्टको इजलासले बिहीबार साइबर अपराधसम्बन्धी मुद्दामा थुनछेक बहसपछि यस्तो आदेश दिएको हो ।

पत्रकार पाठकमाथि साइबर ब्युरोमा परेका उजुरीका आधारमा जिल्ला सरकारी वकिलको कार्यालयले सोमबार मुद्दा दायर गरेको थियो।

सरकारी वकिल तर्फबाट सहायक जिल्ला न्यायाधिवक्ता पूर्णेन्द्र पाण्डेयले विद्युतीय कारोबार ऐन, २०६३ को दफा ४७ अनुसार पाँच वर्षसम्म कैद वा एक लाख रुपैयाँ जरिवाना वा दुवै सजाय माग गर्दै अभियोग दायर गरेका थिए ।

पाठकले आफ्नो टेलिभिजन कार्यक्रम ‘टफ टक’ मा ‘हिल्टनमा जयवीर देउवाको पैसा’ शीर्षक दिएर रिपोर्ट सार्वजनिक गरेका थिए। सो रिपोर्टमा कांग्रेस नेता शेरबहादुर देउवा र परराष्ट्रमन्त्री आरजु राणा देउवाका छोरा जयवीरसिंह देउवाको हिल्टन होटलको सेयर खरिदमा संलग्नता रहेको उल्लेख गरिएको थियो ।

जयवीरले रिपोर्टलाई चरित्र हत्या भएको भन्दै साइबर ब्युरोमा उजुरी दिएका थिए। यसअघि उच्च अदालत पाटनले पाठकलाई धरपकड नगर्न आदेश दिएको थियो। तर पछिल्लो उजुरीपछि साइबर ब्युरोले पुनः मुद्दा अघि बढाएको हो ।