काठमाडौं, १८ असार । कर्णाली विकास बैंकमा भएको अर्बौं रुपैयाँको हिनामिना प्रकरणमा संलग्न रहेको आरोपमा पक्राउ परेका पशुपति दयाल मिश्र नेकपा एमालेका केन्द्रीय सदस्य रहेको खुलासा भएको छ ।

पूर्व जिल्ला विकास समिति (जिविस) सभापति तथा मधेस आन्दोलनबाट उदाएका मिश्रलाई बुधबार नेपालगञ्जबाट प्रहरीको केन्द्रीय अनुसन्धान ब्यूरो (सीआईबी) ले पक्राउ गरेको हो ।

सीआईबीका प्रवक्ता एसपी युवराज खड्काका अनुसार मिश्रलाई बाँकेमै राखेर अनुसन्धान अगाडि बढाइएको छ। उनीमाथि बैंकिङ कसुर तथा सजाय ऐन २०६४ अन्तर्गत अनुसन्धान भइरहेको छ भने नेपाल राष्ट्र बैंक अनुसन्धानमा समन्वयकारी भूमिकामा छ।

पशुपति दयाल मिश्रको राजनीतिक यात्रा विवादास्पद घेराबन्दीमा परेको छ । बैंकको कार्यकारी नेतृत्व सम्हालेकै बीचमा उनी २०७४ सालको प्रतिनिधिसभा चुनावमा बाँके–२ बाट स्वतन्त्र समूहका तर्फबाट, सूर्य चिन्ह लिएर उम्मेदवार बनेका थिए। तर, पराजित भएपछि एमाले प्रवेश गरे र त्यसपछि केन्द्रीय सदस्य बन्न पुगे।

एमाले प्रवेशलगत्तै उनलाई पार्टीले नेपालगञ्ज उपमहानगरपालिकाको मेयर पदका लागि टिकट प्रदान ग¥यो। तर, निर्वाचनमा उनले ११,६७५ मत मात्र पाएर पुनः पराजय भोगे। त्यही चुनावमा नेपाली कांग्रेसका उम्मेदवार प्रशान्त विष्ट २३,४६० मतसहित विजयी भए।

मिश्र २०६६ देखि २०७५ सालसम्म कर्णाली विकास बैंकको अध्यक्ष थिए। बैंकमा अहिलेसम्म २ अर्ब ५० करोड रुपैयाँभन्दा बढी हिनामिना भएको भन्दै उजुरी परेको छ।

यस प्रकरणमा मिश्रसँगै बैंकका संस्थापक अध्यक्ष राजेन्द्रवीर राय र तत्कालीन वित्त प्रमुख देवप्रकाश सिंह ठकुरी पनि पहिले नै पक्राउ परिसकेका छन्।

राजेन्द्रवीर राय बैंकको ८० प्रतिशत संस्थापक सेयरधनी हुन्। उनी २०६० सालमा स्थापना भएको बैंकका प्रारम्भदेखि १५ वर्षसम्म कार्यकारी अध्यक्ष तथा सीईओ को रूपमा कार्यरत थिए।

रायकै नेतृत्वमा बैंक सञ्चालन हुँदै आएको थियो भने अपचलनका मुख्य योजनाकारसमेत उनी नै भएको प्रारम्भिक छानबिनले देखाएको छ।
बैंक सञ्चालक समिति अध्यक्ष डा. ओमप्रकाश मिश्रको संयोजकत्वमा गठित विशेष छानबिन समितिले बैंकमा गम्भीर वित्तीय अनियमितता भएको ठहर गरिसकेको छ।

यसबारे थप प्रमाण संकलन र अभियोजनको तयारीका लागि सीआईबीबाट डीएसपी दान थापाको नेतृत्वमा एक अनुसन्धान टोली बाँके खटिएको छ।