काठमाडौं, १७ असार। सांसद जनार्दन शर्मा संघीय निजामती सेवा विधेयक २०८२ मा रहेको ‘कुलिङ पिरियड’ हेरफेर प्रकरणमा सांसद जनार्दन शर्माले गम्भीर आपत्ति जनाएका छन्। प्रतिनिधिसभाको सोमबारको बैठकमा नेकपा (माओवादी केन्द्र) का नेता शर्माले यस्तो हेरफेर संसदको सार्वभौम अधिकारमाथि हस्तक्षेप भएको टिप्पणी गरे।

सभामुख देवराज घिमिरेको ध्यानाकर्षण गराउँदै बैठकबाट बाहिरिँदै गर्दा शर्माले भने, “यो कार्यले संसदको उपहास भएको छ। समितिले पारित गरेभन्दा बाहिर गएर हेरफेर गरिएको समितिका सदस्यहरूको भनाइ छ। सभापतिले पनि ‘मेरो जानकारीबिना भयो’ भन्नुभएको छ।”

उनले यो कार्यलाई षड्यन्त्र, बदमासी र तुच्छ संज्ञा दिँदै थपे, “संसदको सम्मान मिच्ने गरी जुनकुरा गरियो, त्यो योजनाबद्ध र नियतवश गरिएको देखिन्छ।”

सांसद शर्माले सो प्रकरणको छानबिन आवश्यक भएको भन्दै जिम्मेवारी कसले लिने भन्ने प्रश्न उठाए। “सचिवले लिने ? सभापतिले ? कि समितिले ? जिम्मेवारी लिनैपर्छ,” उनले भने।

उनले भने, “यदि कानुनमै यसरी छलछाम हुन्छ भने, जनताले कसलाई विश्वास गर्ने ? व्यवस्थापिकामाथि कसरी विश्वास गर्ने ? कानुनप्रति विश्वास कसरी कायम रहने ?”

शर्माले घटनाको सत्यतथ्य पत्ता लगाएर दोषीमाथि कडा कारबाही हुनुपर्ने स्पष्ट पारे। “छानबिन गरी कारबाही प्रक्रिया अगाडि बढाएर मात्रै यो अवस्था सच्चाउने दिशामा अघि बढ्न सकिन्छ,” उनले चेतावनी दिए।