पोखरा, २१ जेठ । नेसनल स्पोट्र्स एकेडेमीको आयोजनामा ‘प्रचण्ड कपः राष्ट्रिय महिला भलिबल प्रतियोगिता–२०८२’ पोखरामा हुने भएको छ । तत्कालीन अवस्थामा प्रधानमन्त्री पुष्पकमल दाहाल ‘प्रचण्ड’को सरकारले नै भलिबललाई राष्ट्रिय खेल घोषणा गरेको भन्दैं भलिबल प्रतियोगिता आयोजना गर्न लागिएको हो ।

पोखरामा बुधबार दिउँसो पत्रकार सम्मेलनको आयोजना गर्दै उक्त प्रतियोगितामा राष्ट्रियस्तरका ६ वटा प्रमुख टीम÷क्लबले भाग लिने गरी प्रतियोगिताबारे जानकारी गराईएको हो । अखिल नेपाल खेलकुद महासंघको सहआयोजना रहेको उक्त प्रतियोगिता यही जेठ २७ गतेदेखि ३१ गतेसम्म पोखरा रंगशालास्थित मल्टिपर्पोज कभर्डहलमा हुनेछ ।

नेपालका तीन विभागीय टोलीहरु त्रिभुवन आर्मी क्लब, नेपाल पुलिस क्लब र सशस्त्र प्रहरी बल नेपालको नेपाल एपीएफ क्लब, गण्डकी प्रदेश, न्यु डायमण्ड युथ स्पोट्र्स क्लब र एभरेस्ट भलिबल क्लब प्रतियोगितामा सहभागी हुने नेसनल स्पोट्र्स एकेडेमीका अध्यक्ष दीपक कोइरालाले जानकारी दिए ।

‘प्रतियोगिताको विजेताले ६ लाख रुपैयाँ प्राप्त गर्नेछ भने उपविजेताले तीन लाख रुपैयाँ प्राप्त गर्नेछन्,’ एकेडेमीका अध्यक्ष कोइरालाले भने–‘प्रतियोगितामा तेस्रो हुने टीम÷क्लबले एक लाख रुपैयाँ प्राप्त गर्नेछ ।’ प्रतियोगितामा सर्वोत्कृष्ट खेलाडीलाई तीस हजार रुपैयाँ र अन्य विधागततर्फका उत्कृष्ट खेलाडीहरुलाई जनही बीस हजार रुपैयाँ प्रदान गरिने उनले बताए ।

प्रतियोगिता नेपाल भलिबल संघ र एभआइभिवीको नियमअनुसार राउन्ड रोबिन लिगका आधारमा खेलाइनेछ भने सहभागी टिममा विदेशी खेलाडीको हकमा ३ जनासम्म खेलाडी खेलाउन पाउने व्यवस्था गरिएको छ ।

‘भलिबललाई राष्ट्रिय खेल घोषणा गरेकाले यसै खेलको प्रतियोगिता आयोजना गरि खेलाडीहरुको क्षमता पहिचान र प्रवद्र्धनमा एक कोसेढुङ्गा बनाउने विश्वास लिएका छौं,’ अध्यक्ष कोइरालाले पत्रकार सम्मेलनमा भने, ‘तत्कालीन प्रचण्ड सरकारले नै भलिबललाई राष्ट्रिय खेल घोषणा गरेको थियो । त्यसैले पनि भलिबलको विकास र व्यावसायिक उचाइमा पु¥याउने उद्देश्यले प्रचण्ड कप सुरु गरेका हौं ।’

नेपालको लोकप्रिय र गतिशील हुँदै गएको खेलको रूपमा रहेको भलिवल खेलको विकासमा एउटा इटा थप्ने प्रयास स्वरूप यो प्रतियोगिता आयोजना गर्न लागिएको अध्यक्ष कोइरालाको भनाई थियो । आगामी दिनमा यस प्रतियोगितालाई अझ उत्कृष्ट बनाउँदै लैजाने एकेडेमीले लक्ष्य लिएको र फागुनसम्म पुरुष भलिबल प्रतियोगिता आयोजना गर्ने लक्ष्य रहेको पनि उनले उल्लेख गरे ।

त्यस्तै, प्रतियोगिताको सह–आयोजना रहेको अखिल नेपाल खेलकुद महासंघका अध्यक्ष शिव कोइरालाले खेलकुद क्षेत्र देशलाई अन्तर्राष्ट्रियस्तरमा चिनाउने एकमात्र माध्यम भएकोले वृहत् खेलकुद महोत्सव आयोजनाको तयारीमा जुटिरहेको बताए ।