पोखरा, २१ जेठ । उच्च अदालत बार एसोसिएसन पोखराको अध्यक्षमा शालिग्राम भट्टराई सर्वसम्मत् भएका छन् । मंगलबार भएको मनोनयन दर्तामा डिएलएका तर्फबाट भट्टराईको मनोनयन दर्ता भएको हो ।

आगामी २ वर्षे कार्यसमितिका लागि नेपाली काँग्रेसनिकट डिएलए, एमालेनिकट पिपिलए, माओवादी केन्द्रनिकट आरपिएलए र नेकपा समाजवादीनिकट एसपिएलएको सहमतिसँगै पदाधिकारी र सदस्यमा मनोनयन दर्ता भएको हो ।

सहमतिबमोजिम डिएलएले अध्यक्ष, सचिव र कोषाध्यक्ष तथा ४ सदस्य पाएको छ । पिपिएलले उपाध्यक्ष र सहसचिव पाउने गरी बाँकी ४ सदस्यमा भागबण्डा गरिएको हो ।

निर्वाचन समिति संयोजक वरिष्ठ अधिवक्ता कृष्णबहादुर थापाका अनुसार उपाध्यक्षमा यामबहादुर खत्री, सचिवमा प्रकाश शर्मा, सहसचिवमा ईश्वरी पौडेल, कोषाध्यक्षमा सुजता ढकालले उम्मेदवारी दिएका हुन् ।

सदस्यमा अर्जुन पौडेल, लुमचन्द्र रेग्मी, शिवराज रेग्मी, रमेश गिरी, दीपक शर्मा पौडेल, तिलकप्रसाद कोइराला, डिल्लीराम अधिकारी, घनश्याम बराल र महिला सदस्यमा राधा शर्मा पौडेलको मनोनयन परेको हो । सदस्यमा १ जनाको बढी मनोनयन परेको छ । मनोनयन फिर्ताका लागि बुधबार दिउँसो १ बजेसम्मको समय दिइएको छ ।

अध्यक्षमा सर्वसम्मत् भट्टराई यसअघि फणीन्द्रराज कोइरालाको पालामा उच्चबारमा कोषाध्यक्ष थिए । साथै, जिल्ला बारमा कमल अर्याल अध्यक्ष हुँदा सचिव थिए । निर्वाचन कार्यतालिका अनुसार २४ जेठका लागि मतदान तोकिएको थियो ।