पोखरा, १३ जेठ । टेनिस संघ गण्डकी प्रदेशले आगामी ८ वर्षभित्र १० जना राष्ट्रियस्तरका टेनिस खेलाडी उत्पादन गर्ने लक्ष्यका साथ ग्रो टेनिसअन्तर्गत टेनिस ट्यालेन्ट हन्ट प्रोग्राम–२०२५ सुरु गर्ने भएको छ ।

आइतबार पोखरामा आयोजित पत्रकार सम्मेलनमा संघका अध्यक्ष विनोद कायस्थले भने–‘संघले आर्थिक रूपले कमजोर पृष्ठभूमिका १० जना बालबालिकालाई ८ वर्षसम्म निःशुल्क र निरन्तर प्रशिक्षण प्रदान गर्नेछ ।’ कार्यक्रममा अध्यक्ष कायस्थले उक्त कार्यक्रमको खाकासहित योजना सार्वजनिक गरेका छन् ।

‘यो नेपाली टेनिस इतिहासमै पहिलोपटक सुरू गरिएको दीर्घकालीन योजना हो,’ अध्यक्ष कायस्थले भने–‘ ट्यालेन्ट हन्ट कार्यक्रममार्फत ८ देखि १२ वर्ष उमेर समूहका १० जना खेलाडी छनोट गरिनेछ, जसमा ८ जना बालक र २ जना बालिकालाई प्रशिक्षणमा सहभागी गराइनेछ ।’

उनका अनुसार एकजना खेलाडी उत्पादन गर्न अनुमानित लागत १० देखि १२ लाख रूपैयाँसम्म पर्नेछ । जसमा एक खेलाडी, एक प्रायोजक मोडेलमार्फत योजना अघि बढाइनेछ । एकडेढ महिनामै सुरु हुने सो कार्यक्रममा सुरुआतमा ८ देखि १२ वर्ष उमेर समूहका ४० जना बालबालिका छनोट गरिने छन् । उनीहरुलाई ६ महिनासम्म नियमित प्रशिक्षण दिइनेछ । त्यसपछिको दोस्रो चरणमा ३० जना र अन्तिम चरणमा १० जना खेलाडीहरू छनोट गरिने संघले जनाएको छ ।

पत्रकार सम्मेलनमा गण्डकी विश्वविद्यालयका प्राध्यापक सोनाम लामाले ‘ग्रो टेनिस’ कार्यक्रम नेपाली खेलकुदलाई व्यावसायिक बनाउन अग्रसर हुने कदम भएको उल्लेख गरे । उनले भने, ‘खेलकुदमा भविष्य छ, व्यवहारमा उतार्न सक्नुपर्छ । यो कार्यक्रम नेपाली खेल क्षेत्रमा महत्वपूर्ण मोडल बन्न सक्छ ।’

कार्यक्रममा प्रदेश टेनिस संघ गण्डकीका उपाध्यक्ष लोकबहादुर गुरुङ, उपाध्यक्ष विष्णुबहादुर थापा, महासचिव नवीन चालिसे र कास्की टेनिस संघका अध्यक्ष राजकुमार गुरुङ, प्राविधिक समिति सहसंयोजक एवं पूर्व राष्ट्रिय खेलाडी कुमार अधिकारी लगायतले पोखराबाट सुरु यो कार्यक्रमले निकै महत्व राख्ने बताए ।

पोखराले यसअघि पनि धेरै राम्रा प्लेयर उत्पादन गरिसकेको छ । नेपालको एकमात्र आइटिएफ ¥यांकिङ प्लेयर अभिषेक बास्तोला पोखराबाटै उत्पादित खेलाडी हुन् । पूर्व नेपाल नम्बर प्लेयर कुमार अधिकारी होस् वा प्रदीप खेलाडी पोखराकै शान हुन् । टेनिसबाटै कोचको लाइफमा गएर पनि राम्रो भविष्य छ ।

टेनिस संघ गण्डकीले २ वर्षदेखि ग्रासरुट टेनिस संचालन गरेको छ । पोखरा र यस वरिपरि टेनिसमा बल ब्याइज, अम्पायर, अफिसियल, कोच उत्पादन गर्ने भनी लागिपरेको संघले जनाएको छ । सबै कुराबाट पाठ सिकेर राष्ट्रियस्तरको खेलाडी उत्पादन गर्नुपर्छ भन्ने लक्ष्यका साथ ‘ग्रो टेनिस’ कार्यक्रम सुरु गर्न लागिएको अध्यक्ष कायस्थले प्रस्ट पारे ।