डुम्रे (तनहुँँ), २६ चैत । पर्यटकीय क्षेत्र भुजिकोटको प्रवर्द्धन गर्न उकालो दौड प्रतियोगिता गरिने भएको छ । तनहुँको शुक्लागण्डकी नगरपालिका–२ स्थित पर्यटकीय क्षेत्र भुजिकोट स्थानथोकको पर्यटन प्रवर्द्धन गर्ने उद्देश्यले दौड प्रतियोगिता गरिने भएको हो ।

नयाँ वर्ष २०८२ को पहिलो दिन वैशाख १ गते ग्रामीण पर्यटकीय गाउँ भुजिकोटको प्रचार गर्न ‘दोस्रो भुजिकोट स्थानथोक राष्ट्रिय खुला उकालो दौड प्रतियोगिता’ गरिने अन्नपूर्ण युवा क्लब कोत्रेका पूर्वअध्यक्ष एवं कार्यक्रम संयोजक खेम गुरुङले जानकारी दिनुभयो ।

गुरुङका अनुसार १८ देखि ४५ वर्ष उमेर समूहका महिला र पुरुष सहभागी हुने गरी खुला दौड प्रतियोगिता गरिने भएको हो ।

प्रतियोगितामा प्रथमसहित पाँचौँ स्थानसम्मका धावकलाई पुरस्कारको व्यवस्था गरिएको छ । प्रथम पुरस्कार रु ३३ हजार ३३३, द्वितीय पुरस्कार रु २२ हजार २२२, तृतीय पुरस्कार रु ११ हजार १११, चौथो पुरस्कार रु पाँच हजार ५५५ र पाँचौँ पुरस्कार तीन हजार ३३३ नगद रहेको छ । कोत्रेचोकदेखि स्थानथोकसम्म नौ किलोमिटरको दूरीमा प्रतियोगिता हुने आयोजकले जनाएको छ ।

क्लबका अध्यक्ष अनिल खनालले दौड प्रतियोगिताका साथै गुलेली हान्ने, कुखुराको भाले समाउने र सांस्कृतिक प्रस्तुतिलगायतका कार्यक्रम सञ्चालन गरिने बताउनुभयो । क्लबले विसं २०७५ मा पनि भुजिकोट उकालो दौड प्रतियोगिता सञ्चालन गरेको थियो ।

भुजिकोटबाट कास्कीका सातवटै ताल, विभिन्न हिमशृङ्खला अवलोकन गर्न सकिन्छ ।