पोखरा । कोरोना संक्रमणका कारण गण्डकी प्रदेशमा पाँचजनाको मृत्यु भएको छ । यस प्रदेशमा कोरोना संक्रमणका कारण मृत्यु हुनेको संख्या एकसय २३ पुगेको स्वास्थ्य निर्देशनालय गण्डकी प्रदेशका निर्देशक, गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा.विनोद विन्दु शर्माले जारी गरेको विज्ञप्तिमा उल्लेख छ ।

कोरोना संक्रमणका कारण स्याङ्जा वालिङ नगरपालिका वडा नं. १४ का २४ वर्षीय पुरुषको कार्तिक २७ गते गण्डकी मेडिकल कलेज, पोखरामा उपचारका क्रममा निधन भएको छ । ती पुरुषलाई कार्तिक २७ गते कोरोना संक्रमण पुष्टि भएको थियो । ती पुरुषलाई डाईवेटिज मलाईटसको समस्या रहेको स्वास्थ्य निर्देशनालय गण्डकी प्रदेशले जनाएको छ ।

त्यसैगरी पोखरा–१४ का ६३ वर्षीय कोरोना संक्रमित पुरुषको आज विहान १ः५५ गण्डकी मेडिकल कलेज, पोखरामा उपचारका क्रममा निधन भएको छ । उनलाई कार्तिक १९ गते कोरोना संक्रमण पुष्टि भएको थियो । ती पुरुषलाई डाईवेटिज मलाईटस र हाईपरटेन्सन लगायतका समस्या रहेको अस्पतालको प्रतिवेदनमा उल्लेख छ ।

पोखरा–१५ कि ५० वर्षीय महिलाको पनि कोरोना संक्रमणका कारण कार्तिक २८ गते बेलुका ६ः३० बजे चरक अस्पताल पोखरामा उपचारका क्रममा निधन भएको छ । ती महिलालाई कार्तिक ८ गते कोरोना संक्रमण पुष्टि भएको थियो । उनीमा डाईवेटिज मलाईटस, हाईपरटेन्सन र हाईपरथाईरोडिजम लगायतको समस्या रहेको अस्पतालले जनाएको छ ।

त्यसैगरी, पोखरा वडा नं. २६ का ७२ वर्षीय कोरोना संक्रमित महिलाको आज विहान ७ः४५ बजे उपचारका क्रममा पोखरा स्वास्थ्य विज्ञान प्रतिष्ठान, पोखरामा निधन भएको छ । उनलाई कार्तिक २८ गते कोरोना संक्रमण पुष्टि भएको थियो । ती महिलामा वाईल्याट्रल निमोनिया तथा रेस्पिरेटरी फेलिएरको समस्या देखिएको विज्ञप्तिमा उल्लेख छ ।

कोरोना संक्रमण कैं कारण पोखरा–१८ का ४८ वर्षीय पुरुषको आज विहान ९ः३० बजे उपचारका क्रममा पोखरा स्वास्थ्य विज्ञान प्रतिष्ठान, पोखरामा निधन भएको छ । ती पुरुषलाई कार्तिक २६ गते कोरोना संक्रमण पुष्टि भएको थियो । ती पुरुषमा वाईल्याट्रल निमोनिया तथा रेस्पिरेटरी फेलिएर को समस्या रहेको स्वास्थ्य निर्देशनालय गण्डकी प्रदेशले जारी गरेको विज्ञप्तिमा उल्लेख छ ।

आज पछिल्लो २४ घण्टामा गरिएको पिसिआर परीक्षणका क्रममा गण्डकी प्रदेशमा थप नयाँ दुईसय १० जनामा कोरोना संक्रमण देखिएको छ । सबैभन्दा बढि कोरोना संक्रमित कास्की जिल्लामा एकसय ४८ जनामा देखिएको छ । त्यसैगरी पर्वतमा १८ जना, तनहुँमा १४ जना, म्याग्दीमा १० जना, गोरखामा ६ जना, स्याङ्जामा ५ जना, लमजुङमा ५ जना र बागलुङमा ४ जनामा कोरोना संक्रमण पुष्टि भएको छ । आज नवलपरासी, मनाङ र मुस्ताङमा शुन्य कोरोना संक्रमित रहेका छन् ।

आज १२ सय ७९ जनाको पिसिआर परीक्षण गरिएकोमा दुईसय १० जनामा मात्र कोरोना संक्रमण पुष्टि भएको हो भने एकहजार ६९ जना नेगेटिभ रिपोर्ट आएको थियो । आजमात्र ६१ ज्ना कोरोना संक्रमित निको भएका छन् । त्यसैगरी यस प्रदेशमा एकहजार आठसय ९५ जना होम आईसोलेसनमा रहेका छन् । यस प्रदेशमा संक्रिय कोरोना संक्रमितको संख्या पाँचहजार एकसय दुई रहेको छ ।

मुलुकभर एकहजार ९४६ सङ्क्रमित थपिए, दुईहजार ५०३ निको भए :

मुलुकभर कोरोना भाइरस एक हजार ९४६ जनामा पुष्टि भएको छ । स्वास्थ्य तथा जनसङ्ख्या मन्त्रालयद्वारा आज यहाँ जारी बुलेटिन अनुसार आठ हजार ७५३ जनाको पिसिआर परीक्षण गर्दा ८१६ महिला र एक हजार १३० जना पुरुषमा कोरोना पुष्टि भएको हो । ती सङ्क्रमित मध्ये प्रदेश १ का २२७, प्रदेश २ का ३८, वाग्मती प्रदेशका ९७८, गण्डकी प्रदेशका ३९९, लुम्बिनी प्रदेशका २०९ , कर्णाली प्रदेशका दुई र सुदूरपश्चिम प्रदेशका ९३ जना रहेका छन । ती सङ्क्रमितसँगै नेपालमा अहिलेसम्म दुई लाख ८ हजार २९९ जनामा कोरोना पुष्टि भएकोे छ ।

यस्तै विगत २४ घण्टामा दुई हजार ५०३ जना निको भइ घर फर्किएका छन् । अहिलेसम्म एक लाख ७० हजार ६३२ जना निको भइ घर फर्किसकेका छन । नेपालमा निको हुने दर ८१.९ प्रतिशत रहेको छ । मन्त्रालयका अनुसार ३६ हजार ४५२ जना सक्रिय सङ्क्रमित रहेका छन । मन्त्रालयका अनुसार आज १३ जनाको कोरोनाबाट निधन भएका छ । अहिलेसम्म सङ्क्रमणबाट निधन हुनेको सङ्ख्या एक हजार २१५ पुगेको छ । उपत्यकामा ८३५ सङ्क्रमण देखिएको छ । ती मध्ये ३७९ महिला र ४५६ जना पुरुष रहेका छन् । अहिलेसम्म उपचार गराइरहेका सङ्क्रमितमध्ये ३७६ जना सघन उपचार कक्ष (आइसियु) र ७४ जनाको भेन्टिलेटरमा रहेका छन् ।

ती मध्ये आइसियुमा प्रदेश १ का ५३, प्रदेश २ का १३, वाग्मती प्रदेशका १३६ , गण्डकी प्रदेशका ९४, लुम्बिनी प्रदेशका ६५, कर्णाली प्रदेशका १० र सुदूरपश्चिम प्रदेशका ५ जना रहेका छन । भेन्टिलेटरमा प्रदेश १ का १२ , प्रदेश २ का एक, वाग्मती प्रदेशमा ४४, गण्डकी प्रदेशका १३ र लुम्बिनी प्रदेशका चार जना रहेका छन । पाँच सय भन्दा बढी सङ्क्रमित भएका जिल्लामा झापा, मोरङ, सुनसरी, काठमाडौँ, भक्तपुर, ललितपुर, चितवन, काभ्रे, कास्की, नवलपरासी (पूर्व), दाङ, रुपन्देही र कैलाली रहेका छन । शुन्य सङ्क्रमित रहेको जिल्ला एकमात्र मनाङ रहेको मन्त्रालयले जनाएको छ । क्वारेन्टिनमा एक हजार ५७ जना र होम आइसोलेसनमा सात हजार ७२० जना रहेका छन् ।