पोखरा, २६ भदौं । खुकुरी प्रहार गरी आफ्नै श्रीमतीको हत्या गर्ने जहरसिंह कुँवरलाई प्रहरीले घटनास्थलबाटै आज पक्राउ गरेको छ ।

अन्नपूर्ण गाउँपालिका वडा नं. १ नौडाँडा घर भई हाल पोखरा–८ बगालेटोल बस्ने ४२ वर्षीय जहरसिंह कुँवरले आज बुधबार मध्यान्ह १२ बजेको समयमा खुकुरी प्रहार गरी ४० वर्षीय आफ्नै श्रीमती राधिकाको हत्या गरेका हुन् ।

जहरसिंह कुँवर आफ्नी श्रीमती राधिका र छोरासँग । फाईल तस्विर

मध्याह्न १२ बजेतिर राधिका चिच्याएको आवाज आएपछि घरबेटी गएर हेर्दा जहरसिंहले श्रीमतीलाई खुकुरी प्रहार गरिरहेको देखेपछि तत्कालै प्रहरीलाई खबर गरेका थिए । वडा प्रहरी कार्यालय बैदामको टोलीले जहरसिंहलाई खुकुरीसहित तत्कालै घटनास्थलबाटै पक्राउ गरेको थियो ।
राधिकालाई तत्कालै प्रहरीले पोखरा स्वास्थ्य विज्ञान प्रतिष्ठानमा उपचारका लागि गरेपनि चिकित्सकले १२ः४४ बजे उनलाई मृत घोषणा गरेको कास्की प्रहरी प्रवक्ता डीएसपी बसन्तकुमार शर्माले जानकारी दिए ।

प्रहरीका अनुसार सामान्य विवाद भएपछि जहरसिंहले श्रीमतीलाई खुकुरी प्रहार गरेका थिए । जहरसिंहलाई खुकुरी सहित नियन्त्रणमा लिएर थप अनुसन्धान कार्य भइरहेको प्रहरीले जनाएको छ । उनीहरुको एक छोरा रहेका छन् ।