पर्वत । दक्षिण पर्वतको पैंयु गाउँपालिका वडा नं ४ हुवासमा पर्ने सेतीखोलामा मोटरेवल पुल निर्माण शुरुआत भएको छ । स्थानीय गल्छिना घाटमा निर्माण हुने सो पुलको काम यसै सातादेखि शुरु भएको हो । यसका लागि रु ४ करोड १४ लाख ५५ हजार ३ सय ८४ रुपैँयामा सम्झौता भएको छ । विसं २०७७ जेठ ४ गते सम्झौता भएपनि झण्डै पाँच महिना पछि शुरु भएको छ । पुल २०७८ मंसीर ४गतेसम्म सम्पन्न गर्नुपर्ने अवधि रहेको छ । सिंगल स्पानको उक्त मोटरेवल पुलका लम्वाई ३५ मिटर रहेको छ ।

पुलको भारवहन क्षमता ८० टन रहेको सडक डिभिजन कार्यालय बागलुङले जनाएको छ । उक्त सडक निर्माणको जिम्मा जयनेपाल ईश्वर श्री सिद्धवावा जेभीले लिएको छ । पैंयु गाउँपालिकाको केन्द्र रहेको हुवास स्थित हातेमालो चोक जोड्नका लागि सडक खुलेको झण्डै डेढ दशक पुगेपनि खोलामा पुल नहुँदा यो सडक हुँदै दैनिक चल्ने दर्जनौ साना ठुला सवारी साधनहरु खोलामा जोखिम मोल्दै वारपार गर्ने गरेका थिए ।

गाउँपालिकाकै छिमेकी वडाहरु धरमपानी, बेउलीवास, उराम र महाशीला गाउँपालिकाको होश्राङदी, भोक्सिङ, बालाकोट लगायतका क्षेत्र जोड्ने उक्त सडकमा पुल नहुँदा वर्षायाममा सवारी साधनहरु ठप्प हुने गरेका थिए । हिउँदमा खोलामा जोखिम मोलेर वारपार गर्नुपर्ने अवस्था रहेको पैंयु गाउँपालिकाका अध्यक्ष खगेन्द्र तिवारीले जानकारी दिनुभयो । उहाँका अनुसार पुल बनेपछि पैंयु गाउँपालिका र छिमेकी पालिकाका विभिन्न वडाका नागरिहरु प्रत्यक्ष रुपमा लाभान्वित हुने भएका छन् । वर्षा र हिउँदयाम बाह्रैमास सवारी साधन सञ्चालन गर्न सहज हुने छ ।

गण्डकी प्रदेशका उद्योग पर्यटन वन तथा वातावरण मन्त्री विकास लम्सालले पुलको शिलान्यास गर्दै समयमै र तोकिएको गुणस्तर काम गरेर निर्माण गर्न आग्रह गर्नुभयो । मुलुक अहिले विकास निर्माणको द्रुत गतिमा अघि बढिरहेका बेला कोरोना भाईरसले तीनै तहका सरकारलाई धक्का पु¥याएको र अब कोभिडसँगसँगै विकास निर्माणलाई पनि अघि बढाउनुपर्ने बताउनुभयो ।