पोखरा । कास्की रुपा गाउँपालिका वडा नं. ५ का ७२ वर्षीय कोरोना संक्रमित पुरुषको आज विहान ८ः३० बजे पोखरा स्वास्थ्य विज्ञान प्रतिष्ठान, पश्चिमाञ्चल क्षेत्रीय अस्पतालमा उपचारको क्रममा निधन भएको स्वास्थ्य निर्देशनालय गण्डकी प्रदेशका निर्देशक तथा गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा.विनोद विन्दु शर्माले जानकारी दिएका छन् ।

कार्तिक २४ गते कोरोना संक्रमणको पुष्टि भएका ती पुरुषलाई बाईल्याट्रल निमोनिया, एक्युट किड्नी इन्जुरी लगायतका समस्याहरु रहेको थियो । गण्डकी प्रदेशमा कोरोना संक्रमणका कारण मृत्यु हुनेहरुको संख्या एकसय १३ पुगेको छ ।

स्वास्थ्य निर्देशनालय गण्डकी प्रदेशका अनुसार अध्यावधिक पछिल्लो विवरण अनुसार अहिलेसम्म प्रदेशका विभिन्न जिल्लामा गरेर एकसय ५४ जनामा कोरोना संक्रमण पुष्टि भएको छ । आजमात्र कास्कीमा एकसय १९ जना, बागलुङमा २० जना, तनहुँमा ७ जना, स्याङ्जामा २ जना र नवलपरासी (पूर्व)मा ३ जना गरी एकसय ५४ नयाँ कोरोना संक्रमित थपिएका हुन् ।