स्रोतका अनुसार सरकारी सुन तस्करका नाईके भनेर चिनिने झलकराम, तस्करीमैं संलग्न माओवादी नेताका पुत्रद्वय राहुल, दीपेश र भण्डारीले नेपाल प्रहरीको केन्द्रीय अनुसन्धान ब्यूरो (सीआईबी)मा पुरानो मोवाईल लुकाएर नयाँ मोवाईल सेट परीक्षणका लागि दिएको रहस्य खुलेको छ ।

पोखरा, २ असोज । ६० किलो सुन तस्करी र भेपमा लुकाएर ल्याएको ९ किलो सुन तस्करी प्रकरणमा संलग्न आरोपितहरुले नेपाल प्रहरीको केन्द्रीय अनुसन्धान ब्यूरो (सीआईबी)मा पुरानो मोवाईल लुकाएर नयाँ मोवाईल सेट परीक्षणका लागि दिएको रहस्य खुलेको छ ।

गृहमन्त्री नारायणकाजी श्रेष्ठसँग नजिकको सम्बन्ध बनाएका तत्कालिन अध्यागमन विभागका महानिर्देशक झलकराम अधिकारी लगायतका टोलीले पुरानो मोवाईलमा लुकाउँदैं नयाँ मोवाईल सेट अनुसन्धानका लागि प्रहरीलाई दिएको तथ्य बाहिरिएको छ ।

अधिकारीसँगैं माओवादी नेता कृष्णबहादुर महराका छोरा राहुल, पूर्वउपराष्ट्रपति नन्दबहादुर पुनका छोरा दीपेश पुन र विध ल्याबका सञ्चालक भीमकाण्ड भण्डारीले पुरानो मोवाईल लुकाएर १० दिन अघिमात्र प्रयोगमा ल्याइएको नयाँ मोवाईल सेट परीक्षणका लागि दिइएको रहस्य खुलेको हो ।

स्रोतका अनुसार सरकारी सुन तस्करका नाईके भनेर चिनिने अधिकारी, तस्करीमैं संलग्न माओवादी नेताका पुत्रद्वय राहुल, दीपेश र भण्डारीले पहिला चलाउँदैं आएको पुरानो मोवाईलको आईएमइआई नम्बर र अहिले ल्याएको मोवाईलको आईएमईआई नम्बर फरक–फरक देखिएको छ ।

तस्करीमा फस्ने भएपछि प्रमाण नष्ट गर्दै केही दिन अघि मात्र एक्टिभेट भएको मोवाईल दिएर प्रहरी अनुसन्धानलाई सहयोग नभई असहयोग गरेका छन् । माओवादीका नेता तथा तिनका सन्तान अनेकन् धन्दामा संलग्न भएपछि प्रधानमन्त्री पुष्पकमल दाहाल ‘प्रचण्ड’ले सुन तस्करी काण्डमा हाईप्रोफाईलका तस्करहरुलाई कारवाही गर्न नै सकेनन् ।

वषौंदेखि तस्करीमा संलग्न महरा, नन्दबहादुर पुनका छोराहरु र माओवादी कार्यकर्ता भण्डारीका विषयमा प्रमाणहरु हुँदा हुँदैं पनि गृहमन्त्री श्रेष्ठको दवावका कारण प्रहरीले सतही अनुसन्धान गरेर उनीहरुलाई बचाउने प्रयास गरेको देखिन्छ । सरकारी कर्मचारी रहेका अधिकारी जहाँ जहाँ र जुन जुन कार्यालयको नेतृत्व सम्हाल्न पुगे, उनले कहीं पनि लुट्न बाँकी नराखेका उनका हर्कतहरुले पुष्टि गरिरहेका छन् ।

तस्करी र भ्रष्टाचारमा वषौंदेखि माहिर खेलाडी अधिकारी झलकराम अधिकारी ६० किलो सुन तस्करी प्रकरणमा तिब्बती मूलका बेल्जियन नागरिक दावा छिरिङ पक्राउ परेसँगै उदाङ्गो भएका हुन् । सुन तस्करको मुख्य नाईके दावासँगको संवादको सप्रमाण प्रहरीले भेटेपछि अधिकारीलाई अध्यागमनबाट हटाउँदैं सरकारले गृहमन्त्रालयमा तानेको थियो ।

यता, ६० किलो सुनसँगैं यसअघि इलेक्ट्रिक सिगरेट भेपमा लुकाएर ल्याएको ९ किलो सुन तस्करी काण्डमा माओवादी नेता कृष्णबहादुर महरासहित उनका छोरा राहुल र पूर्वउपराष्ट्रपति नन्दबहादु पुनका छोरा दीपेशको पनि संलग्नता भेटिएको हो । यता, झलकराम, राहुल, दीपेश र भीमकान्तले ‘क्लिनचिट’ लिने प्रयोजनका लागि मात्रै सीआईबीमा उपस्थित भएर बयान कागज गरेको स्रोतको भनाई छ ।

६० किलो सुन प्रकरणमा माओवादी नेता र तिनका आफन्तको सबैभन्दा बढि संलग्नता भेट्टिएको छ । माओवादीका उपमहासचिव रहेका वर्षमान पुनका भाइ प्रनेश पुन र ठमेलको भियना होटलकी सञ्चालक समेत रहेकी बैनी पर्ने अमला रोका पनि यो गिरोहका मुख्य नाईकेका रुपमा देखिएका छन् ।

अमला सुन प्रकरणका नाइके मानिएका बेल्जिएम दावा छिरिङकी पत्नी समेत हुन् । प्रनेश पुन र दावा पत्नी अमला सुन उत्खनन् तथा प्रशोधन गर्ने कम्पनी भियना मल्टीप्रपोजको व्यापारिक साझेदार समेत रहेको खुलेका छ । अहिले फरार रहेकी अमला पक्राउ परेसँगैं प्रहरीले हाईप्रोफाईलमा रहेर तस्करीमा संलग्नहरुको नकाव अवश्य पनि उतार्ने छ ।

तर यी छ जनालाई नैं प्रधानमन्त्री प्रचण्ड र गृहमन्त्री श्रेष्ठको संरक्षण रहँदा यिनीहरुमाथि कडा छानबिन र कारवाही अघि बढ्न सकिरहेको छैन । सप्रमाण सुन तस्करीमा संलग्न रहेका यी पात्रहरुलाई जोगाउने चक्करमा प्रधानमन्त्री प्रचण्डले जनतामाझ बढ्दै गईरहेको लोकप्रियता र सरकारप्रतिको विश्वास पनि गुमाएका छन् ।