पोखरा । कोरोना संक्रमणका कारण गण्डकी प्रदेशमा आजमात्र तीनजनाको मृत्यु भएको छ । कोरोना संक्रमण कैं कारण यस प्रदेशमा एकसय तीनजनाले ज्यान गुमाई सकेको गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा.विनोद विन्दु शर्माले जानकारी दिएका छन् ।

यसरी मृत्यु हुनेमा नवलपुर जिल्ला, गैंडाकोट नगरपालिका वडा नं. १२ का ८२ वर्षीय पुरुषको कोरोना संक्रमणका कारण हिजो दिउँसो २ः०० बजे चितवन मेडिकल कलेज चितवनमा उपचारका क्रममा मृत्यु भएको हो । ती पुरुषलाई कार्तिक १८ गते कोरोना संक्रमणको पुष्टि भएको थियो । कार्तिक ३ गते पेटको आन्द्रामा समस्या भई सोही अस्पतालमा उपचारका क्रममा पछि कोरोना संक्रमण देखिएको थियो ।

पोखरा महानगरपालिका वडा नं. १७ का २९ वर्षीय महिलाको पनि कोरोना संक्रमणका कारण हिजो दिउँसो २ः२३ बजे चरकम मेमोरियल अस्पताल, पोखरामा उपचारका क्रममा निधन भएको छ । ती महिलामा कार्तिक १६ गते कोरोना संक्रमण पुष्टि भएको थियो ।

त्यसैगरी, स्याङ्जा जिल्ला, पुतलीबजार नगरपालिका वडा नं. ८ का ७३ वर्षीय कोरोना संक्रमित महिलाको आज फेवासिटी अस्पताल पोखरामा उपचारको क्रममा निधन भएको छ । ती महिलालाई कार्तिक १९ गते कोरोना संक्रमण पुष्टि भएको थियो । ती महिलामा हाईपरटेन्सनको समस्या रहेको स्वास्थ्य निर्देशनालय गडकी प्रदेशले जारी गरेको विज्ञप्तिमा उल्लेख छ ।

गण्डकी प्रदेशमा पछिल्लो २४ घण्टामा दुईसय ७८ जना कोरोना संक्रमित थपिएका छन् । यस अवधिमा १७ जना निको भएका छन् । यस प्रदेशमा संक्रमितको संख्या नौं हजार १७ पुगेको छ । यस प्रदेशमा हालसम्म चार हजार आठसय ५२ जना कोरोना संक्रमित निको भईसकेका छन् । साथै यस प्रदेशमा सक्रिय संक्रमितको संख्या चार हजार ६२ पुगेको निर्देशनालयले जनाएको छ ।