लक्ष्मीनारायण साकोसको वार्षिक १० औ वार्षिक साधारण सभा सम्पन्न

लमजुङ, २५ मंसिर । महिलाहरुद्वारा सञ्चालित लक्ष्मीनारायण बचत तथा ऋण सहकारी संस्था लिमिटेडको १० औ वार्षिक साधारण सभा सम्पन्न भएको छ । साकोसका अध्यक्ष सृजना घिमिरेको अध्यक्षतामा भएको साधारसभाको उद्घाटन प्रदेशसभा सदस्य भेषवहादुर पौडेलले गरेका थिए ।

साधारण सभालाई सम्बोधन गर्दै प्रदेशसभा सदस्य पौडेलले राष्ट्रिय रुपमा नीतिगत कुराहरुलाई केही परिमार्जन गर्नुपर्ने धारणा व्यक्त गर्दै नियमन निकायलाई अलिकति व्यवस्थित गर्नुपर्नेमा जोड दिए । केही सहकारी नीतिनियमलाई दुरुपयोग गर्दै गर्दा तथा आफू अनुकुलको काम गर्दै गर्दा नीतिगत रुपमा वित्तीय सेवा प्रदान गर्दै आएका सहकारीहरु पनि समस्यामा परेको उनको भनाई थियो ।

सहकारीको सहयोगबाट आफूलाई समृद्ध बनाएका थुप्रै उदाहरणहरु हामीले देख्न सकिने भन्दै उनले संस्थागत रुपमा राम्रालाई पुरस्कृत र खराबलाई दण्डित गर्न सकियो भने सहकारीमा अवसर र विश्वासको वातावरण सृजना हुने बताए । प्रदेश सभा सदस्य पौडेलले आफूले पाउने जिम्मेवारी र आफ्नो क्षमताले भ्याएसम्म सहकारी क्षेत्रको विकासका लागि सदैव पहल गर्ने प्रतिवद्धता व्यक्त गरे ।

२०६९ सालमा ४० जना शेयर सदस्यहरुबाट सुरु भएको लक्ष्मीनारायण सहकारीमा हाल १४ सय ५४ शेयर सदस्य पुगेको साकोसका अध्यक्ष सृजना घिमिरेले बताईन् । अध्यक्ष घिमिरेका अनुसार दुईलाख शेयर पँुजीबाट सुरु भएको साकोसको शेयर पुँजी वृद्धि भई हाल ८९ लाख ५३ हजार ३ सय रुपैयाँ पुगेको छ । विगतका वर्षमा कोभिडका कारण लाभांस वितरण गर्न नसकेको साकोसले चालु आर्थिक वर्षमा लक्ष्य अुरुपको लाभांस वितरण गर्ने प्रयासमा रहेको अध्यक्ष घिमिरेले बताईन् ।

आर्थिक बर्ष २०७८/०७९ मा १७ करोड ९५ लाख ७८ हजार ३ सय ९० रुपैयाको कारोवार गरेको साकोसले १५ लाख २० हजार ७ सय ९६ रुपैयाँ मुनाफा आर्जन गरेको जनाएको छ ।

साकोसले गएको आर्थिक वर्षमा १० करोड ४ लाख ९८ हजार ३ सय ८९ रुपैया बचत संकलन गरेको साकोसको कुल सम्पत्ति भने आर्थिक वर्ष ०७८÷०७९ को वासलात ५ करोड १२ लाख ५० हजार २ सय ६५ रुपैयाँ रहेको साकोसका प्रवन्धक जितमाया गुरुङले बताईन् । महिलाहरुको नेतृत्वमा सञ्चालित साकोसले वित्तीय क्षेत्रमा खाली बचत संकलन र ऋण प्रवाह मात्र नभई महिलाहरुलाई आर्थिक एवं समाजिक रुपले सशक्त वनाउन विभिन्न आय आर्जन एवं सिपमुलक कार्यक्रमहरु गर्दै आएको सहकारीका लेखा समिति संयोजक सिता न्यौपानेले बताईन् ।

कार्यक्रममा लक्ष्मी नारायण पुस्तकालयका अध्यक्ष नराइन बहादुर सुयाल, बेसीशहर ८ का वडासदस्य कल्पना बोहोरा, साकोसका सल्लाहाकार तेजनारायण अधिकारी, नेफ्सुकनका प्रतिनिधि सन्देश घिमिरे, शिक्षक कल्याण सहकारीका रमेश अधिकारी र पुस्तकालय महिला उपसमिति संयोजक सिता श्रेष्ठ लगायतले मन्तव्य राख्नुभएको थियो ।

कार्यक्रममा साकोसका उपाध्यक्ष ज्ञानुमाया नखोलाले स्वागत, संस्थापक अध्यक्ष शोभा थापाले धन्यवाद ज्ञापन र कार्यक्रमको सञ्चालन सचिव भगवती जोशीले गरेका थिए ।

साधारण सभाका अवसरमा सहकारीले कार्यक्रमका प्रमुख अतिथि नवनिर्वाचित प्रदेश सभा सदस्य भेषवहादुर पौडेललाई फूलमाला अभिर र मायाको चिनोले सम्मान गरिएको थियो । त्यस्तै असल बचतकर्ताको रुपमा मैया श्रेष्ठ, असल ऋणिको रुपमा खातुन मिया, २०७८ को एसईईमा उत्कृष्ट नम्बर ल्याउन सफल शेयर सदस्यका छोराछोरीतर्फ आकृति गुरुङ र भावना गुरुङलाई सम्मान गरिएको थियो ।