पोखरा, ९ मंसिर । कास्की निर्वाचन क्षेत्र नम्बर १ क मा नेकपा एमालेका खगराज अधिकारी निर्वाचित भएका छन् । स्थानीय समेत रहेका एमालेका नेता अधिकारीले चितवन घर भई हाल कास्कीमा राजनीति गर्दै आईरहेका माओवादीका दिपक कोइरालालाई ३ हजार ९ सय ९६ मतान्तरले हराएका हुन् ।

एमालेले भावि गण्डकी प्रदेशका मुख्यमन्त्रीको रुपमा प्रचारप्रसार गरेका नेता अधिकारीले १५ हजार ६ सय २३ मत ल्याएका थिए । उनका प्रतिस्पर्धी माओवादीका उम्मेदवार कोइरालाले ११ हजार ६ सय २७ मत प्राप्त गरेका छन् । एमालेका नेता अधिकारी यसअघि संघीय संसद सदस्य थिए भने माओवादीका नेता कोइराला गण्डकी प्रदेश सदस्य थिए ।

एमाले नेता अधिकारी दुईपटक मन्त्री भईसकेका पात्र हुन् । दुईपटक मन्त्री हुँदा अधिकारीले खासै कास्कीका लागि उल्लेख्य काम नगरे पनि प्रदेशको मुख्यमन्त्री बनाउने एमालेको चुनावी प्रचारप्रसारको ‘अस्त्र’ले अधिकारीलाई जित हासिल गर्न सहज भएको देखिन्छ ।

यता, माओवादी नेता कोइरालालाई ‘टुरिष्ट नेता’को आरोप लाग्दै आईरहेको थियो । माओवादी भित्रको विवाद र प्रभावशाली नेता तथा कार्यकर्ताले पार्टी छोड्नु पर्ने स्थिति सिर्जना हुँदै गएको परिवेशमा समग्र कास्की भरी नै यसपटक माओवादीका लागि जित ‘फलामको चिउरा’ सावित हुन पुग्यो । एकातर्फ गठबन्धनबाट पनि सोचे जस्तो मत आउन सकेन भने अर्को माओवादी छाड्न विवश नेता तथा कार्यकर्ताको कारण पनि जीत सुनिश्चित भएका ठाउँमा माओवादी पराजित हुन पुग्यो ।