पोखरा, २३ कार्तिक । गण्डकी प्रदेशका उर्जा मन्त्री हरिशरण आचार्य बर्खास्तीमा परेका छन् । गोरखाका सत्ता गठबन्धनका उम्मेदवारविरुद्ध भोट मागेको आरोप लागेपछि गण्डकी प्रदेशका मुख्यमन्त्री कृष्णचन्द्र नेपाली पोखरेलले मन्त्री आचार्यलाई बर्खास्त गरेका हुन् ।

मुख्यमन्त्री पोखरेलले ऊर्जा मन्त्रालय आफैँसँग राखेका छन् । मन्त्री आचार्यलाई आफ्नै सहकर्मीसमेत रहेका नेता फणिन्द्र देवकोटालाई हराउनका लागि भूमिका खेलिरहेको आरोप लगाईएको छ ।

आचार्य बाबुराम भट्टराई नेतृत्वको नेपाल समाजवादी पार्टीका निवर्तमान सांसद हुन् । २०७४ मा गोरखा क्षेत्र नम्बर १ को प्रदेश सभा क्षेत्र (क) बाट तत्कालीन नयाँ शक्तिका आचार्य निर्वाचित भएका थिए ।

आचार्य यसपालि पनि सोही प्रदेश सभा क्षेत्रमा उम्मेदवार हुन चाहेका थिए । तर तर माओवादीको चुनाव चिन्ह हँसिया हतौडामा उठ्ने गरी समाजवादीले फणिन्द्र देवकोटालाई टिकट दिन पुग्यो । त्यसपछि रूष्ट मन्त्री आचार्यले स्वतन्त्र उम्मेदवारी दिन पुगे । तर अध्यक्ष बाबुराम भट्टराई लगायतको दवावपछि उनले फिर्ता लिन बाध्य भए ।

गोरखास्थित समाजवादी पार्टी, माओवादी केन्द्रका जिल्लास्तरीय नेताहरूले आचार्यले सत्ता गठबन्धनका उम्मेदवारलाई सहयोग नगरेको र भित्रभित्रै अरू पार्टीलाई सहयोग गरिरहेको ‘सुइँको पाएपछि’ उनलाई मन्त्रीबाट हटाउने योजना बनाउन पुगे । शीर्षस्थ नेताहरुलाई निरन्तर दवाव दिए पछि मन्त्री आचार्य पदच्यूत हुन पुगे ।